Kirungi omuntu okulindirira obulokozi bwa Mukama n’obukkakkamu

“Olw’okwagala kwa Mukama okutaggwaawo, tetulimalibwawo, kubanga ekisa kye tekiggwaawo. Buli lukya ekisa kyo kiba kiggya; n’obwesigwa bwo bwa lubeerera.” Okukungubaga 3:22-23

Omuwumbo gwaffe leero gujjudde ebya ssava okuva mu Okukungubaga 1-5.

Bwe tujjako akawuwo kyogerwa nti.

“Ekibuga ekyajjulanga abantu nga kyabuliddwa! Ekyabanga eky’amaanyi mu mawanga, nga kifuuse nga nnamwandu!” Okukungubaga 1:1

Era nti,

“Enguudo za Sayuuni zikungubaga, kubanga tewali n’omu ajja ku mbaga zaakyo ezaalagibwa. Emiryango gye gyonna girekeddwa awo…” Okukungubaga 1:4

Era nti,

“Abamuyigganya bafuuse bakama be; abalabe be beeyagala, kubanga Mukama amuleeseeko ennaku, olw’ebibi bye ebingi.” Okukungubaga 1:5

Kyongerwako nti,

“Obutali bulongoofu bwe bwali mu birenge bye; teyassaayo mwoyo ku bulamu bwe obw’ebiseera ebijja. Okugwa kwe kwali kwa kyewuunyo; tewaali n’omu amubeesabeesa.” Okukungubaga 1:9

Era nti,

“Abantu be bonna basinda nga bwe banoonya ekyokulya; eby’obugagga byabwe babiwanyisaamu emmere, okusobola okuba abalamu.” Okukungubaga 1:11

Era Yuda agamba nti,

“Mmwe tekibakwatako, mmwe mwenna abayitawo? mwetegereze mulabe obanga waliwo obuyinike obwenkana, obwantukako, Mukama bwe yanteekako ku lunaku olw’obusungu bwe obungi.” Okukungubaga 1:12

Era nti,

“Yaweereza omuliro okuva waggulu, ne gukka mu magumba gange.” Okukungubaga 1:13

Era nti,

“Ebibi byange binfuukidde ekikoligo; bisibiddwa ne binywezebwa omukono gwe.” Okukungubaga 1:14

Era nti,

“Kyenva nkaaba, amaaso gange ne gajjula amaziga, kubanga tewali n’omu andi kumpi okumbeesabeesa, ayinza okunzizaamu amaanyi. Abaana bange banakuwavu kubanga omulabe awangudde.” Okukungubaga 1:16

Wabula agamba nti,

“Mukama mutuukirivu, newaakubadde nga najeemera ekiragiro kye.” Okukungubaga 1:18

Era nti,

“Bakabona bange n’abakadde b’ekibuga kyange bazikiririra mu kibuga nga banoonya ekyokulya baddemu amaanyi.” Okukungubaga 1:19b

Era nti,

“Ebweru ekitala kirindiridde okunsanyaawo, ne mu nnyumba mulimu kufa kwereere.” Okukungubaga 1:20

Era kyogerwa ku Mukama nti,

“Enyigidde Yakobo okufaanana ng’omuliro bwe gubumbujja ne gwokya buli ekiguliraanye.” Okukungubaga 2:3c

Era nti,

“Azikirizza ebyo byonna ebisanyusa amaaso mu weema ey’omuwala wa Sayuuni.” Okukungubaga 2:4b

Era kyogerwa nti,

“Mukama afuuse ng’omulabe azikirizza Isirayiri, n’azikiriza embiri ze, n’azikiriza n’ebifo bye eby’amaanyi.” Okukungubaga 2:5

Era nti,

“Mukama yeerabizza Sayuuni embaga ze entukuvu ne ssabbiti, era mu busungu bwe obungi anyoomye kabaka ne kabona.” Okukungubaga 2:6b

Era nti,

“Ne bannabbi be tebakyafuna kwolesebwa kuva eri Mukama.” Okukungubaga 2:9c

Era kyogerwa nti,

“Amaaso gange gakooye olw’okukaaba n’emmeeme yange enyiikadde n’omutima gwange gulumwa olw’okuzikirizibwa kw’abantu bange, n’olw’abaana abato n’abaana abawere okuzirikira wakati mu nguudo ez’omu kibuga.” Okukungubaga 2:11

Era nti,

“Okwolesebwa bannabbi bo kwe baafuna, kwali kwa bulimba era kwa butaliimu; tebaakutegeeza obutali butuukirivu bwo okukuwonya obusibe. Engero ze baabanyumizanga zaali za bulimba era eziwabya.” Okukungubaga 2:14

Era nti,

“Mukama akoze kye yateekateeka, era atuukirizza ekigambo kye kye yalagira mu nnaku ez’edda.” Okukungubaga 2:17

Era kyogerwa nti,

“Kaabirira Mukama n’eddoboozi ery’omwanguka ggwe Omuwala wa Sayuuni. Leka amaziga go gakulukute ng’omugga emisana n’ekiro. Teweewummuza so toganya maaso go kuwummula.” Okukungubaga 2:18

Era tulaba okusaba nti,

“Tunula, Ayi Mukama Katonda osaasire! Ani gwe wali obonerezza bw’otyo? Ddala, abakyala balye ebibala by’embuto zaabwe, abaana be bakuzizza?” Okukungubaga 2:20

Era kyogerwa nti,

“Nze muntu eyakangavvulwa n’omuggo ogw’obusungu bwe. Angobye mu maaso ge n’antambuliza mu kizikiza, awatali kitangaala.” Okukungubaga 3:1

Era nti,

“Ne bwe mukoowoola ne mukaabira nga mmusaba anyambe, okusaba kwange akuggalira bweru.” Okukungubaga 3:8

Era nti,

“Nafuuka ekisekererwa eri abantu bonna, era bannyooma nga bannyimbirira okuzibya obudde.” Okukungubaga 3:14

Era nti,

“Emmeeme yange terina mirembe, n’okujjukira sijjukira bugagga bwe bufaanana.” Okukungubaga 3:17

Era nti,

“Ebyo byonna mbijjukira, kyenvudde mbeera n’essuubi.” Okukungubaga 3:21

Nti,

“Olw’okwagala kwa Mukama okutaggwaawo, tetulimalibwawo, kubanga ekisa kye tekiggwaawo. Buli lukya ekisa kyo kiba kiggya; n’obwesigwa bwo bwa lubeerera.” Okukungubaga 3:22-23

Era nti,

“Njogera mu mutima gwange nti, “Mukama gwe mugabo gwange, kyenaava mbeera n’essuubi mu ye.” Okukungubaga 3:24

Era nti,

“Mukama mulungi eri abo abamulinamu essuubi, eri oyo amunoonya. Kirungi omuntu okulindirira obulokozi bwa Mukama n’obukkakkamu. Kirungi omuntu okwetikka ekikoligo kye mu buvubuka bwe” Okukungubaga 3:25-27

Era nti,

“Kubanga Mukama taligobera bantu bweru ebbanga lyonna. Newaakubadde ng’aleeta obulumi, aliraga ekisa kubanga okwagala kwe kungi nnyo tekuggwaawo.” Okukungubaga 3:31-32

Era nti,

“Tagenderera kuleeta bulumi newaakubadde okubonaabona ku baana ba bantu.” Okukungubaga 3:33

Era kibuzibwa nti,

“Ani ayinza okwogera ekintu ne kituukirira, Mukama nga takiragidde?” Okukungubaga 3:37

Era nti,

“Lwaki omuntu omulamu yeemulugunya, bw’abonerezebwa olw’ebibi bye?” Okukungubaga 3:39

Era kyogerwa nti,

“Twekebere engeri zaffe, era tuzeetegereze, tude eri Mukama. Tuyimuse emitima gyaffe n’emikono gyaffe eri Katonda mu ggulu, twogere nti, twayonoona ne tujeema, tokyerabiranga era tonatusonyiwa.” Okukungubaga 3:40-42

Era nti,

“Weebisseeko ekire, waleme okubaawo okusaba n’okumu okutuuka gy’oli.” Okukungubaga 3:44

Era nti,

“Era amaaso gange ganeeyongeranga okukulukuta amaziga awatali kusirika, okutuusa Mukama lw’alisinzira mu ggulu n’alaba.” Okukungubaga 3:49-50

Era nti,

“Nakoowoola erinnya lyo, Ayi Mukama nga ndi mu bunnya wansi ennyo; wawulira okwegayirira kwange: toziba matu go eri okukaaba kwange.” Okukungubaga 3:55-56

Ayongerako nti,

“Bwe nakukoowoola wansemberera n’oyogera nti , “totya!” Mukama watunula munsonga yange, era n’onunula obulamu bwange.” Okukungubaga 3:57-58

Bwe tweyongerayo kyogerwa nti,

“Zaabu ng’ettalazze! Zaabu ennungi ng’efuuse! Amayinja ag’omuwendo gasaasaanye buli luguudo we lutandikira.” Okukungubaga 4:1

Era Mukama agamba nti,

“Ebibbe biyonsa abaana baabyo, naye abantu bange bafuuse ng’abatalina kisa, bafaanana nga bammaaya mu ddungu.” Okukungubaga 4:3

Era nti,

Abaalyanga ebiwoomerera basabiriza ku nguudo; n’abo abaakuzibwa ng’abambala engoye ezinekaaneka bali ku ntuumu ez’ebisasiro.” Okukungubaga 4:5

Era nti,

“Abafa ekitala bafa bulungi okusinga abafa enjala, kubanga abafa enjala bayongobera ne baggwaawo olw’obutaba na mmere mu nnimiro.” Okukungubaga 4:9

Era nti,

“Abakazi ab’ekisa abaagala abaana bafumbye abaana baabwe; abaana abaafuuka emmere abantu bange bwe baazikirizibwa.” Okukungubaga 4:10

Era nti,

“Bakabona tebakyassibwamu kitibwa, newakubadde abakadde okuweebwa ebifo eby’okumwanjo.” Okukungubaga 4:16b

Era kyogerwa nti,

“Oyo Mukama gwe yafukako amafuta yagwa mu mitego gyabwe. Twalowooza nga tulikwekebwa mu kisikirize kye.” Okukungubaga 4:20

Era Tulaba okusaba Mukama nti,

“Jjukira Ayi Mukama ekitutuuseeko. Tunula olabe ennaku yaffe. Omugabo gwaffe guweereddwa  bannamawanga, n’amaka gaffe gatwaliddwa abatali mu nnyumba.” Okukungubaga 5:1-2

Era nti,

“Tusasulira amazzi ge tunywa; n’enku tuteekwa okuzigula.” Okukungubaga 5:4

Era nti,

“Bajjajjaffe baayonoona, ne bafa, naye tubonerezebwa olw’ebikolwa byabwe ebitaali bya butukirivu.” Okukungubaga 5:7

Era nti,

“Emitima gyaffe tegikyasanyuka, n’okuzina kwaffe kufuuse kukungubaga.” Okukungubaga 5:15

Era tulaba okusaba nti,

“Ggwe, Ayi Mukama obeerera ennaku zonna; entebe yp ey’obwakabaka ya mirembe na mirembe.” Okukungubaga 5:19

Era nti,

“Tuddiremu, Ayi Muakma, tudde gy’oli. Tukomyewo gy’oli Ayi Mukama, otuzze buggya ng’edda.” Okukungubaga 5:20b-21

 

 

 

 

 

 

 

 

 

 

 

Mukama alituukiriza ekigendererwa kye

“Mudduke Babulooni. Mudduke okuwonya obulamu bwammwe. Temusaanawo olw’ebibi bye.” Yeremiya 51:6

“Kubanga ekiseera kijja lwe ndibonereza ebifaananyi bya bakatonda ba Babulooni abaakolebwa n’emikono.” Yeremiya 51:47

Ekjjulo kyaffe leero kijjudde ebya ssava okuva mu Yeremiya 50-52.

Bwe tusosootola, tulaba obubaka ku Babulooni.  Era Mukama agamba nti,

“Eggwanga okuva mu bukiikakkono lijja kukirumba lyonoone ensi y’Abakaludaaya. Tewali muntu alisigalamu; abantu bonna balikiddukamu era n’ensolo zonna.” Yeremiya 50:3

Wabula,

“Mu nnaku ezo, era mu kiseera ekyo, …, abantu ba Isirayiri awamu n’abantu ba Yuda balikaaba amaziga nga banoonya Mukama Katonda waabwe.” Yeremiya 50:4

Balyogeera nti,

“Mujje twesibe ku Mukama Katonda mu ndagaano ey’emirembe gyonna etegenda kwerabirwa.” Yeremiya 50:5b

Era Mukama agamba nti,

“Abantu bange babadde ndiga ezibuze; abasumba baabwe babawabizza.” Yeremiya 50:6a

Era nti,

“Buli eyabasanganga nga abatulugunya; abalabe baabwe ne bagamba nti, tetulina musango gwe tuzza, kubanga baajeemera MUKAMA KATONDA, OBUDDUKIRO BWABWE OBWA NNAMA DDALA, YE MUKAMA, ESSUUBI LYA BAKITAABWE.” Yeremiya 50:7

Era Mukama agamba nti,

“Isirayiri kisibo kya ndiga ezisaasaanye, empologoma kye zigobye. Eyasooka okumulya yali kabaka wa Bwasuli; eyasembayo okumenya amagumba ge yali Nebukadduneeza kabaka w’e Babulooni.” Yeremiya 50:17

Era Mukama kyaba agamba nti,

“Ndibonereza kabaka w’e Babulooni n’ensi ye nga bwe nabonereza kabaka w’e Bwasuli.” Yeremiya 50:18b

Wabula era agamba nti,

“Mu nnaku ezo, era mu biseera ebyo, .., omusango ku Isirayiri gulinoonyezebwa, naye tegulibaawo, era n’ebibi bya Yuda birinoonyezebwa, naye tewaliba na kimu, KUBANGA NDISONYIWA ABO BENDESEEWO.” Yeremiya 50:20

Era ku Babulooni kyogera nti,

“Ennyondo y’ensi yonna ng’ekubiddwa n’emenyeka! Babulooni kifuuse matongo mu mawanga!” Yeremiya 50:23

Era nti,

“Mukama agguddewo etterekero ly’ebyokulwanyisa bye naggyamu ebyokulwanyisa eby’ekiruyi kye, kubanga Mukama Katonda ow’Eggye alina omulimu ogw’okukola mu nsi y’Abakaludaaya.” Yeremiya 50:25

Era nti,

“Muwulire eby’abadduka n’abanoonyi b’obubudamu okuva mu Babulooni nga balangirira mu Sayuuni engeri Mukama Katonda waffe gye yeesasuzza , gye yeesasuzza olwa yeekaalu ye.” Yeremiya 50:28

Era ku Babulooni Mukama ayogera nti,

“Laba, ndi mulabe wo, ggwe ow’amalala.” Yeremiya 50:31

Wabula eri Isirayiri kyogerwa nti,

“Omununuzi waabwe w’amaanyi, Mukama Katonda ow’Eggye lye linnya lye. Alirwanira ensonga zaabwe awatali kubuusabuusa, alyoke aleete emirembe mu nsi yaabwe; wabula alireeta okutabukatabuka  mu bantu ba Babulooni.” Yeremiya 50:34

Bwe tweyongerayo ekibonerezo kya Babulooni kyogerwako. Mukama ayogera nti,

“Laba, ndiyimusa omwoyo gw’omuzikiriza alumbe Babulooni n’abantu ba Lebukamaayi.” Yeremiya 51:1

Era kyogerwa nti,

“Mudduke Babulooni. Mudduke okuwonya obulamu bwammwe. Temusaanawo olw’ebibi bye.” Yeremiya 51:6

Wabula,

“Babulooni kyali kikompe kya zaabu mu mukono gwa Mukama; yatamiiza ensi yonna.” Yeremiya 51:7

Wabula kyogerwa nti,

“Mukama atulwaniridde, mujje tukitegeeze mu Sayuuni ekyo Mukama Katonda waffe ky’akoze.” Yeremiya 51:10

Ewalala kyogerwa nti,

“Mukama alituukiriza ekigendererwa kye…” Yeremiya 51:12c

Era nti,

“Ensi yagikola n’amaanyi ge; yagiteekawo n’amagezi ge, nayanjuluza eggulu n’okutegeera kwe.” Yeremiya 51:15

Era nti,

“Bw’abwatuka, amazzi ag’omu ggulu gawuluguma; ayimusa ebire okuva ku nkomerero y’ensi. Amyansisa eggulu mu nkuba era n’aggya empwewo mu mawanika ge.” Yeremiya 51:16

Ba katonda abawese bogerwako nti tebagasa…! Wabula,

“Oyo omugabo gwa Yakobo tali nga bano, kubanga yakola ebintu byonna, nga mwotwalidde n’eggwanga ly’omugabo gwe, n’erinnya lye ye Mukama Katonda ow’Eggye.” Yeremiya 51:19

Era Mukama ayogera nti,

“Muli mbazzi yange, ekyokulwanyisa kyange eky’olutalo, mmwe be nkozesa okubetenta amawanga, mmwe be nkozesa okuzikiriza obwakabaka.” Yeremiya 51:20

Era nti,

“Ndisasula Babulooni ne bonna ababeeramu nga mulaba olw’ebibi byonna bye baakola mu Sayuuni.” Yeremiya 51:24

Abatuula mu Sayuuni boogera nti,

“Leka okubonaabona okututuuseeko kubeere ku Babulooni.” Yeremiya 51:35

Mukama kwe kuddamu nti,

“Laba ndikulwanirira era ndikuwolerera eggwanga; Ndikaliza ennyanja ye n’ensulo ze.” Yeremiya 51:36

Era nti,

“Babulooni kirifuuka bifunvu, mpuku ya bibe, ekintu ekyenyinyalwa n’okusekererwa, ekifo omutali abeeramu.” Yeremiya 51:37

Era Mukama agamba nti,

“Mukiveemu, abantu bange! Mudduke muwonye obulamu bwammwe! Mudduke muwone obusungu bwa Mukama obubuubuuka.” Yeremiya 51:45

Era nti,

“Kubanga ekiseera kijja lwe ndibonereza ebifaananyi bya bakatonda ba Babulooni abaakolebwa n’emikono.” Yeremiya 51:47

Era nti,

“Omuzikiriza alirumba Babulooni; abalwanyi be baliwambibwa, n’emitego gyabwe girimenyebwa. Kubanga Mukama Katonda asasula, alisasula mu bujjuvu.” Yeremiya 51:56

Obubaka ku Babulooni Yeremiya yabuwa omukungu Seraya bwe yagenda e Babulooni era nga yali wa busomera e Babulooni mu ddoboozi ery’omwanguka. Era Yeremiya amulagira nti,

“Bw’omalanga okusoma omuzingo guno gusibeeko ejjinja ogukanyuge mu mugga Fulaati. Olyoke ogambe  nti, ‘Bw’ati  Babulooni bwalisaanawo aleme kubbulukuka olw’akabi ke ndimuleetako. N’abantu be balizikirira.” Yeremiya 51:63-64

Bwe tweyongerayo tulaba okugwa kwa Yerusaalemi. Kigambibwa nti,

“Abalabe ba Yerusaalemi ne Yuda ne babalumba kubanga Mukama yali abanyiigidde. ku nkomerero n’abagobamu mu nsi. Ebyo byonna ne bituuka ku Yerusaalemi ne ku Yuda, Mukama n’okugoba n’abagoba mu maaso ge.” Yeremiya 52:3

Era nti,

“Awo kabaka w’e Babulooni n’atta batabani ba Zeddekiya nga kitaabwe alaba; n’atta n’abakungu bonna aba Yuda.” Yeremiya 52:10

Era nti,

“Nebukadduneeza n’ayokya yeekaalu ya Mukama n’olubiri lwa kabaka, n’ennyumba zonna eza Yerusaalemi. Buli kizimbe kyonna eky’omugaso n’akyokya.” Yeremiya 52:13

 

 

Ndimenya bye nazimba, nkuule bye nasimba…!

“Ndimenya bye nazimba, nkuule bye nasimba mu ggwanga lyonna…naye buli gy’olaga nnaakuyambanga osigale ng’oli mulamu.” Yeremiya 45:4b,5b

Ekijjulo kyaffe leero lulimu ebirungo okuva mu Yeremiya 41-45.

Bwetujjako akawuwo, tulaba nga Gedaliya (gavana, kabaka  w’e Babulooni gwe yali ataddewo okufuga mu nsi) attibwa Isimaeri omu ku balangira ba Yuda.

Era tulaba ng’abaduumizi ba magye bonna wamu n’abantu bonna okuva ku asokerwako wansi okutuuka ku akomererayo waggulu begayirira nnabbi Yeremiya nti,

“Saba Mukama Katonda wo atubuulire gye tusaanye okulaga ne kye tusaanye okukola.” Yeremiya 42:3.

Era bongerako nti,

“Saba Mukama abeere omujulirwa ow’amazima era omwesigwa gye tuli, bwe tutalikola kyonna Mukama Katonda wo ky’anaakutuma okutugamba.” Yeremiya 42:5

Era bwewayitawo ebbanga, Mukama ayogera nti,

“Bwe munaasigala mu nsi, nzija kubazimba era sibaleke kugwa. Nzija kubasimba so si kbasimbulula, kubanga nnumiddwa olw’ekikangwabwa ye mbatuusizzaako.” Yeremiya 42:10

Era nti,

“Temumutya, bw’ayogera Mukama, kubanga ndi nammwe era nzija kubalokola, mbanunule mu  mumukono gwa kabaka oyo. Nzija kubalaga ekisa alyoke abakwatirwe ekisa abakomyewo mu nsi yammwe.” Yeremiya 42:11

Era Mukama abalabula obutaddukira Misiri. Era abagamba nti,

“Mumanyire ddala nti, Abo bonna abamaliridde okugenda e Misiri okusenga eyo balifa kitala, n’enjala ne kawumpuli; tewaliba n’omu alisigalawo wadde okuwona ekikangabwa kye ndibaleetako.” Yeremiya 42:17

Wabula ne wabaawo abawakanya obubaka bwa Yeremiya nti,

“Olimba! Mukama Katonda wo takutumye kugamba nti, ‘Temugenda Misiri kusenga eyo’.” Yeremiya 43:2b

Era kyogerwa nti,

“Awo ne bayingira e Misiri nga bajeemedde Mukama, ne bagenda okutuukira ddala e Tapanese.” Yeremiya 43:7

Era Mukama ayogera eri abantu bonna abali baddukidde e Misiri nti,

“Mwalaba ekikangabwa ekinene kye naleeta ku Yerusaalemi ne ku kibuga byonna ebya Yuda. Leero MAtongo olw’ebibi bye baakola. Bankwasa obusungu olw’okwotereza bakatonda abalala obubaane n’okusinza, bo newaakubadde mmwe wade bajjajjammwe be batamanyangako.” Yeremiya 44:2

Era nti,

“Emirundi mingi natuma abaddu bange bannabbi, abaabagamba nti, ‘Temukola bintu bino eby’omuzizo bye nkyawa!” Yeremiya 44:4

Wabula kigambibwa nti,

“Naye tebaawulira wadde okufaayo; tebaalekayo mpisa zaabwe embi wadde okulekayo okwotereza bakatonda abalala obubaane.” Yeremiya 44:5

Era nti,

“Noolwekyo, obusungu bwange obungi ennyo kyebwava bubabuubuukira; ne buzinda ebibuga bya Yuda n’enguudo za Yerusaalemi era ne bifuuka amatongo, ne leero.” Yeremiya 44:6

Mukama kyaba abuuza nti,

“Lwaki munsunguwaza olw’ebyo emikono gyammwe bye gikoze, nga mwotereza bakatonda abalala obubaane e Misiri, gye mwajja okubeera?” Yeremiya 44:8

Era olw’ebyo, Mukama agamba nti,

“Okuva ku muto okutuuka ku mukulu asingayo balifa era balifuuka ekyenyinyalwa n’eky’okusekererwa era n’okukolimirwa.” Yeremiya 44:12b

Wabula abantu baddamu nti,

“Tetujja kuwulira bubaka bw’oyogedde mu linnya lya Mukama!” Yeremiya 44:16

Mukama kyava agamba nti,

“Ndayira mu linnya lyange ekkulu, bw’ayogera Mukama nti, Tewali n’omu ku abo abaava mu Yuda ababeera mu Misiri, aliddayo okuyita erinnya lyange wadde okulayira nti, Nga Mukama Katonda bw’ali omulamu.” Yeremiya 44:26

Era nti,

“Kubanga mbawaddeyo eri akabi, si lwa bulungi; Abayudaaya abali mu Misiri balimalibwawo n’ekitala n’enjala okutuusa bonna lwe baliggwaawo.” Yeremiya 44:27

Era bwe tweyongerayo kyogerwa nti Baluki yagamba nti,

“Zinsanze Mukama Katonda agasse ennaku ku bulumi bwange; mpweddemu endasi era nzijjudde okusinda n’obutawummula.” Yeremiya 45:3

Wabula Mukama agamba nti,

“Ndimenya bye nazimba, nkuule bye nasimba mu ggwanga lyonna…naye buli gy’olaga nnaakuyambanga osigale ng’oli mulamu.” Yeremiya 45:4b,5b

Ayi Mukama, mu busungu jjukira okusaasira!

“Ayi Mukama, mpulidde ebigambo byo; mpulidde ettutumu lyo Ayi Mukama, ne ntya. Bizze buggya mu nnaku zaffe, bimanyise mu biro bino, era mu busungu jjukira okusaasira.” Kaabakuuku 3:2

Oluwombo lwaffe leero lulimu ebirungo okuva mu Kaabakuuku 1-3.

Ekitabo kino kyawandiikibwa mu biiro Abababulooni bwe baali nga bebafuga abantu ba Yuda era baali bakoleddwako ebikolwa eby’ettima n’eby’obukambwe.

Bwetujjako akawuwo, tulaba nga Kaabakuuku yeemulugunya eri Mukama. Agamba nti,

“Ayi Mukama, ndituusa ddi okukukaabirira naye nga tompuliriza? Lwaki nkukaabirira nti, “Ebikolwa eby’obukambwe bimpitiriddeko,” naye n’otonnyamba?” Kaabakuuku 1:2

Wabula okuddamu kwa Mukama kulaga nti ebyali biriwo byonna, gwali mulimugwe. Era Mukama agamba nti,

“Kubanga laba, nkuyimusiza Abakaludaaya, eggwanga eryo eririna ettima era ekkambwe, ababunye ensi eno n’eri nga bawamba amawanga agatali gaabwe.” Kaabakuuku 1:6

Era nti,

“Ba ntiisa, batiibwa, be beetekera amateeka gaabwe era bagassa mu nkola, nga balwanirira ekitiibwa kyabwe.” Kaabakuuku 1:7

Bwe tweyongerayo, nnabbi Kaabakuuku ayongera okwemulugunya.

“Ayi Mukama toli wa mirembe na mirembe, ggwe Mukama Katonda wange, si ggwe Mutukuvu wange?” Kaabakuuku 1:12

Era nti,

“Amaaso go gajjudde obulongoofu tegatunula ku kibi, so toyinza kugumiikiriza bukyamu. Kale lwaki ogumiikiriza ab’enkwe, n’osirika ng’omubi amalirawo ddala omuntu amusinga obutuukirivu?” Kaabakuuku 1:13

Era Mukama addamu nti,

“Wandiika okwolesebwa okwo. Kuwandiike bulungi ate omubaka gwe banaatuma, akutwale bunnambiro.” Kaabakuuku 2:2

Ayongerako nti,

“Kubanga okwolesebwa okwo kujja mu kiseera kyakwo ekigere. Kwogera ku by’enkomerero ate si kwa bulimba. Bwe kunaaba ng’okuluddewo, mukulindirire, kujja kutuukirira, tekugya kulwa. “ Kaabakuuku 2:3

Era nti,

“Laba oyo ow’emmeeme eteri nnongoofu wa kugwa… “ Kaabakuuku 2:4a

Era nti,

“Naye omutuukirivu aliba mulamu olw’okukkiriza kwe. “ Kaabakuuku 2:4b

Era kyogerwa nti,

“Omwenge mulimba guleetera omuntu amalala, ate taguwummulako. Ate olwokubanga gwa mululu ng’emagombe, mu butakkuta gufaanana okufa. Era okufaanana ng’olumbe, tegukkuta, amawanga gonna gugeekuŋŋanyizaako ne gugafuula abasibe.” Kaabakuuku 2:5

Era ku boonoonyi kyogerwa nti,

“Zimusanze oyo eyeyongeza ebitali bibye! Oyo eyeetuumako obugagga obuva mu nguzi!” Kaabakuuku 2:6

Era nti,

“Zimusanze oyo azimbira amaka ge ku bikolwa ebibi, azimba ekisu kye waggulu, okwekuuma obutatuukwako kabi!.” Kaabakuuku 2:9

Era nti,

“Zimusanze oyo azimba ekibuga n’omusaayi, atandika ekibuga n’obutali butuukirivu.” Kaabakuuku 2:12

Era kibuuzibwa nti,

“Tekyategekebwa Mukama ow’Eggye nti okutegana kw’abantu nku buku za muliro, n’amawanga geemalamu ensa olw’ebintu ebitaliimu?” Kaabakuuku 2:13

Era nti,

“Kubanga ensi erijjula okumanya ekitiibwa kya Mukama, ng’amazzi bwe ganjaala ku nnyanja.” Kaabakuuku 2:14

Era nti,

“Zimusanze oyo awa baliraanwa be ekitamiiza n’akibafukira okuva mu kita n’abawa banywe okutuusa lwe batamiira asobole okutunuulira ensonyi zaabwe!” Kaabakuuku 2:15

Ku Mukama kyogerwa nti,

“Naye Mukama ali mu yeekaalu ye entukuvu: ensi zonna zisirikirire mu maaso ge.” Kaabakuuku 2:20

Bwe tweyongerayo, nnabbi Kaabakuuku asaba nti,

“Ayi Mukama, mpulidde ebigambo byo; mpulidde ettutumu lyo Ayi Mukama, ne ntya. Bizze buggya mu nnaku zaffe, bimanyise mu biro bino, era mu busungu jjukira okusaasira.” Kaabakuuku 3:2

Era nti,

“Katonda yajja ng’ava e Tamani, Omutukuvu oyo ng’ava ku lusozi Palani. Ekitibwa kye kyatimbibwa ku ggulu, ensi n’eryoka ejjula ettendo lye.” Kaabakuuku 3:3

Era nti,

“Okumasamasa kwe ne kulyoka kubeera ng’enjuba evaayo. Ebimyanso byayakanga okuva mu mukono gwe, era omwo mwe mwasinziiranga amaanyi ge ag’ekitalo.” Kaabakuuku 3:4

Era nti,

“Kawumpuli ye yakulembera, Endwadde endala zinaamutta ne zigoberera.” Kaabakuuku 3:5

Era nti,

“Watambula okuyita mu nsi ng’ojjudde ekiruyi, wasambirirasambirira amawanga mu busungu bwo.” Kaabakuuku 3:12

Era nti,

“Wavaayo oleetere abantu bo obulokozi, olokole gwe wafukako amafuta.” Kaabakuuku 3:13

 

Bwe tweyongerayo, Kaabakuuku asanyukira mu Mukama. Era agamba nti,

“Naye nnaalindirira n’obugumiikiriza olunaku olw’okulabiramu ennaku bwe lulijjira eggwanga eritulumba.” Kaabakuuku 3:16b

Era nti,

“Wadde omutiini tegutojjera, so n’emizabbibu nga tegiriko bibala, amakungula g’emizeeyituuni ne gabula, ennimiro ne zitabala mmere n’akamu, endiga nga ziwedddemu mu kisibo, nga n’ente tezikyalimu mu biraalo, kyokka ndijaguliza Mukama, ne nsanyukira mu Katonda omulokozi wange.” Kaabakuuku 3:17-18

Amaliriza nti,

“Mukama Katonda, ge maanyi gange; afuula ebigere byange okuba ng’eby’empeewo, era ansobozesa okutambulira mu bifo ebigulumivu.” Kaabakuuku 3:19

 

 

 

 

 

 

 

 

 

 

 

 

 

 

 

Ayi Katonda,… gw’oleeta obulokozi mu nsi

“Ggwe wateekawo ensalo z’ensi; ggwe wakola ebiro eby’ekyeya n’eby’obutiti.” Zabbuli 74:17

Ekijjulo kyaffe leero kijjudde ebya ssava okuva mu Yeremiya 35-40; Psalm 74 & 79

Bwetusosotoola, mu kibego ekisooka tulaba nga Mukama alagira Yeremiya agende eri ekika ky’Abalekabu akiyite bajje mu kisenge ky’ennyumba ya Mukama abawe wayini banywe. Wabula tulaba nga bamudamu nti,

“Tetujja kunywa wayini kubanga jjajjaffe Yonadabu mutabani wa Lekabu yatulagira nti, ‘Tewabanga n’omu ku mmwe wadde abaana bammwe anywanga wayini. Era temuzimbanga ennyumba, wadde okusiganga ensigo wadde okusimba emizabbibu; temubanga na bintu bino byonna, naye mubeeranga mu weema zokka. Olwo munaawangaliranga mu nsi gye munaaberangamu.'” Yeremiya 35:6-7

Awo nno, Mukama kyava ayogera eri abantu ba Yuda n’ab’omu Yerusaalemi nti,

“Temuyinza kubaako kye muyiga, ne mugondera ebigambo byange? Yonadabu mutabani wa Lekabu yalagira batabani be obutanywa wayini n’ekiragiro kino kyakumibwa.” Yeremiya 35:13b-14a

Era nti,

“Okutuusa ne leero tebanywa wayini, kubanga baagondera etteeka lya jjajjaabwe. Naye njogedde nammwe emirundi mingi, naye temuŋŋondedde.” Yeremiya 35:14b

Era ayongerako nti,

“‘Emirundi mingi, natuma abaddu bange bonna bannabbi gye muli.’ babagamba nti, ‘Buli omu ku  mmwe ateekwa okuva mu makubo ge amabi akyuse ebikolwa bye, muleme kugoberera bakatonda balala okubaweereza, mulyoke mubeere mu nsi gye nabawa ne bajjajjammwe.’ Naye temwanfaako wadde okumpuliriza. “ Yeremiya 35:15

Era Mukama kyava ayogera nti,

“Muwulirize, ŋŋenda kuleeta ku Yuda ne ku buli muntu yenna atuula mu Yerusaalemu buli kibonoobono kye naboogerako. Nayogera nabo, naye tebampuliriza; nabayita, naye tebanziramu.” Yeremiya 35:17

Era Mukama nayogera ku nnyumba y’Abalekabu nti,

“Yonadabu mutabani wa Lekabu talirema kuba na mwana we alimpereza.” Yeremiya 35:19b

Bwe tweyongerayo, Mukama agamba Yeremiya nti,

“Twala omuzingo gw’empapula oguwandiikeko ebigambo byonna bye njogedde naawe ebikwata ku Isirayiri, ne Yuda n’amawanga gonna okuva mu biseera bye natandika okwogera naawe okuva ku bufuzi bwa Yosiya okutuusa kaakano.” Yeremiya 36:2

Era nga ekigendererwa kyali nti,

“Oboolyawo abantu ba Yuda bwe banaawulira ku bikangabwa bye ntegeka okubateekako, buli omu ku bo anaakyuka okuleka amakubo ge amabi, ndyoke mbasonyiwe ebibi byabwe n’obutali butuukirivu bwabwe.” Yeremiya 36:3

Wabula kubanga Yeremiya yali yaganibwa okugenda mu nnyumba ya Mukama, atuuma Baluki mutabani wa Neriya nti,

“Kale laga mu nnyumba ya Mukama ku lunaku olw’okusiiba osomere abantu ebigambo bua Mukama ebiri ku muzingo by’owandiise nga njogera. Bisomere abantu ba Yuda bonna abava mu bibuga byabwe. Oboolyaawo banaaleeta okwegayirira kwabwe eri Muka, era buli omu anaava mu makubo ge amabi, kubanga obusungu n’ekiruyi Mukama by’agambye okutuusa ku bantu bano binene nnyo.” Yeremiya 36:6-7

Era tulaba nga Mikaaya abuuliira abakungu bye yaali awulidde Baluki asomera abantu okuva ku muzingo. Era tulaba nga batumya Baluki wamu n;omuzingo agubasomere. Era tulaba nga basalawo okutegeeza kabaka ebigambo ebyo. Era tulaba kabaka ng’atuma Yekudi okuleeta omuzingo okuva ew’omuwandiisi era n’ebagumusomera. Kigambibwa nti,

“Buli Yekudi lwe yasomangako empapula  ssatu oba nga nnya ez’omuzingo, kabaka ng’azisala n’akambe k’omuwandiisi n’azisuula mu muliro okutuusa omuzingo gwonna lwe gwajjirira mu muliro.” Yeremiya 36:23

Era tulaba nga kabaka alagira okukwatibwa kwa Baluki ne Yeremiya, wabula Mukama yaali abakwese. Era Mukama ayogera eri Yeremiya nti,

“Twala omuzingo omulala oguwandiikeko ebigambo byonna ebyali ku muzingo ogwasooka, YEkoyakimu kabaka wa Yuda gwe yayokya.” Yeremiya 36:28

Bwe tweyongerayo, tulaba nga Nebukadduneeza kabaka w’e Babulooni afuula Zeddekiya mutabani wa Yosiya kabaka wa Yuda okuba kabaka wa Yuda.

Era kitegezebwa nti,

“Wabula ye wadde abakungu be wadde abantu ab’omu nsi tebaafaayo ku bigambo Mukama bye yali ayogedde ng’ayita mu nnabbi Yeremiya.” Yeremiya 37:2

Bwe tweyonegrayo tulaba nga Yeremiya bamukuba era ne bamusibira mu nnyumba ya Yonasaani omuwandiisi, gye baali bafudde ekkomera.

Wabula Zeddekiya atuywa Yeremiya era naleteebwa mu lubiri n’amubuliza mu kyama nti,

“Olinayo ekigambo kyonna okuva eri Mukama?” Yeremiya n’addamu nti, “Weewaawo, ojja kuweebwayo eri kabaka w’e Babulooni.” Yeremiya 37:17b

Era Yeremiya abuuza kabaka Zeddekiya nti,

“Musango ki gwe nzizizza gy’oli oba eri abakungu bo oba abantu bano; mulyoke munteeke mu kkomera?” Yeremiya 37:18

Bwe tweyongerayo, Mukama agamba nti,

“Buli muntu anaasigala mu kibuga kino ajja kufa ekitala, enjala oba kawumpuli, naye buli afuluma n’agenda eri Abakaludaaya ajja kuba mulamu.” Yeremiya 38:2

Era tulaba ng’abakungu bagamba kabaka nga Yeremiya bwe yali asaana okuttibwa. Era Kabaka n’amuteeka mu ngalo zaabwe. Bwatyo Yeremiya nateekebwa mu kinnya. Wabula Ebedumeleki Omuwesiyopya, omu ku balawe b’omu lubiri lwa kabaka, bweyakiwulira, nasaba kabaka amukkirize okujja Yeremiya mi kinnya, era ne kikolebwa.

Bwe tweyongerayo tulaba Zeddekiya kabaka ng’atumya Yeremiya okudamu okumwebuuzaako. Era Yeremiya nategeeza kabaka Mukama kyagamba nti,

“Singa weewaayo eri abakungu ba kabaka w’e Babulooni, ojja kukuumibwa bulungi tootuukibweko kabi konna, n’ekibuga kino tekijja kwokebwa; ggwe n’ab’omu maka go munaabeera balamu.” Yeremiya 38:17

Era Zeddekiya kabaka agamba Yeremiya nti,

“Tobuulirako muntu n’omu ku bye twogedde, bw’onookikola ojja kufa.” Yeremiya 38:24

Bwe tweyongerayo, tulaba nga Nebukadduneeza kabaka w’e Babulooni alumba Yerusaalemi era bwe wayitawo ebbanga ekisenge ky’ekibuga kyabotorwa. Era kabaka Zeddekiya n’abaserikale be bonna n’ebadduka mukibuga ekiro. Wabula eggye ly’Abakaludaaya ne libagoba era n’eribawamba.

Era tulaba nga Nebukadduneeza aggyamu kabaka Zeddekiya amaaso.

Era tulaba nga,

“Nebuzaladaani omuduumizi w’eggye, n’aleka abamu ka bantu abaavu abaali batalina kantu, mu nsi ya Yuda; n’abawa ebibanja n’ennimiro z’emizabbibu.” Yeremiya 39:10

Era Nebukadduneeza yawa omuduumizi ebiragiro ebikwata ku Yeremiya nti,

“Mmutwale omulabirire: tomubonyaabonya wabula mukolere byonna by’ayagala.” Yeremiya 39:12

Era Mukama awa Yeremiya ekigambo kya Ebedumeleki Omuwesiyopya nti,

“Naye ndikuwonya ku lunaku olwo…toliweebwayo eri abo b’otya. Ndikuwonya; tolittibwa, olisigala ng’oli mulamu, kubanga onnesiga, bw’ayogera Mukama.” Yeremiya 39:17

Ewalala mu Zabbuli ya Asafu eya 74, tulaba okwebuuza nti,

“Ayi Katonda, lwaki otusuulidde ddala ennaku zonna? Obusungu bwo lwaki bunyookera ku ndiga z’omu ddundiro lyo?” Zabbuli 74:1

Era tulaba okwongera ku mbeera ya Sayuuni bwe yaali. Ekibuga kyali kyononeddwa, ewatukuvu waali wookeddwa.

Wabula Asafu ayogera nti,

“Naye ggwe, Ayi Katonda, oli Kabaka wange wa dda; gw’oleeta obulokozi mu nsi.” Zabbuli 74:12

Era ku Katonda kyogerwa nti,

“Ggwe wazibukula ensulo n’emyala; ate n’okaza n’emigga egyakulukutanga bulijjo.” Zabbuli 74:15

Era nti,

“Obudde bw’emisana bubwo, n’ekiro kikyo; ggwe wakola omwezi n’enjuba.” Zabbuli 74:16

Era nti,

“Ggwe wateekawo ensalo z’ensi; ggwe wakola ebiro eby’ekyeya n’eby’obutiti.” Zabbuli 74:17

Era nti,

“Tokkiriza abo abajoogebwa okuwangulwa; era leka abaavu n’abeetaga batenderezenga erinnya lyo ennaku zonna.” Zabbuli 74:21

Era Asafu agenda mumaaso ng’agamba nti,

“Ayi Katonda omugabo gwo gulumbiddwa amawanga; boonoonye yeekaalu yo entukuvu ne Yerusaalemi kizikiriziddwa, ne kifuuka entuumo.” Zabbuli 79:1

Era nti,

“Baliraanwa baffe batuyisaamu amaaso, era tufuuse ekisekererwa eri abo abatwetoolodde.” Zabbuli 79:4

Era asaba nti,

“Totubalira kibi kya bajjajjaffe; tukusaba oyanguwe okutusaasira kubanga tuli mu bwetaavu bungi nnyo.” Zabbuli 79:8

Era nti,

“Tuyambe olw’ekitiibwa ky’erinnya lyo, Ayi Katonda ow’obulokozi bwaffe; otuwonye era otutangiririre olw’ebibi byaffe olw’erinnya lyo.” Zabbuli 79:9

Era nti,

“Ayi Ayi Mukama, baliraanwa baffe abakuduulira, bawalane emirundi musanvu.” Zabbuli 79:12

“Kale nno, ffe abantu bo era endiga ez’omuddundiro lyo, tulyoke tukutenderezenga emirembe gyonna.” Zabbuli 79:13

 

Mumpite n’abayitaba

“Mumpite n’abayitaba ne mbalaga ebikulu ebitanoonyezeka bye mutamanyi.” Yeremiya 33:3

Ekijjulo kyaffe leero kijjudde ebya ssava okuva mu: Yeremiya 32-34. 

Bwetujjako akawuwo, tulaba nga amaggye ga kabaka Nebukadduneeza ow’e Babulooni gazingizza Yerusalemi era nga ne Yeremiya asibiddwa kabaka Zeddekiya owa Yuda. Mukama Agamba nti,

“Bwe munaalwanyisa Abakaludaaya, temujja kuwangula.” Yeremiya 32:5b

Era tulaba nga Mukama agamba Yeremiya okugula ennimiro ya  Kanameri mutabani wa Kojjaawe era nagigula.

Era Mukama yalina obubaka bwe yaali ategeeza Isirayiri olw’ekyo kyeyagamba Yeremiya okukola. Obubaka bwali nti,

“Ennyumba, n’ebibanja n’ennimiro ez’emizabbibu biriddamu okugulibwa mu nsi eno.” Yeremiya 32:15b

Era Tulaba nga Yeremiya asaba nti,

“Ayi Mukama Katonda, ggwe wakola eggulu n’ensi n’amaanyi go amangi ennyo ennyo, n’omukono gwo ogugoloddwa. Tewali kintu na kimu kikulema.” Yeremiya 32:17

Ayongerako nti,

“Ayi Katonda ow’ekitalo era ow’amaanyi, ayitibwa Mukama Katonda ow’Eggye, ebigendererwa byo nga binene era n’ebikolwa byo nga bikulu. Amaaso go gatunulidde amakubo gonna ag’abantu, osasula buli muntu ng’enneeyisa ye bweri era ng’ebikolwa bye bwe biri.” Yeremiya 32:18b-19

Wabula Yeremiya bwe yaali nga akyasaba, ekigambo kya Mukama ne kimujjira nti,

“Nze Mukama, Katonda w’abantu bonna. Eriyo ekinnema.” Yeremiya 32:27

Era Mukama agenda mu maaso okutegeeza Yeremiya nga bwe yaali anatera okuwaayo ekibuga, okuwambibwa Abakaludaaya ne Nebukaduneeza kabaka w’e Babulooni. Era awa ensonga nti,

“Abantu ba Isirayiri ne Yuda bye bakoze bibi byereere mu maaso gange okuva mu buvubuka bwabwe; era ddala abantu ba Isirayiri tebalina kirala kye bakoze wabula okunyiiza n’ebyo emikono gyabwe gye bikoze.” Yeremiya 32:30

Era nti,

“Okuva ku lunaku lwe kyazimbibwa ne leero, ekibuga kino kindeetedde obusungu bungi n’ekiruyi, noolwekyo nteekwa okukiggya mu maaso gange.” Yeremiya 32:31

Era nti,

“Banvaako ne bankuba amabega mu kifo ky’okuntunuulira; wadde nga nabayigiriza ne nkiddiŋŋana emirundi mingi naye tebaawuliriza wadde okufaayo eri okukangavvulwa.” Yeremiya 32:33

Wadde ng’ekibuga kyali kyakuwambibwa, Mukama asuubiza nti,

“…ndibakomyawo mu kifi kino, mubeere n’emirembe. Era balibeera bantu bange, nange mbeere Katonda waabwe.” Yeremiya 32:37b-28

Era nti,

“Ndibawa omutima gumu n’ekkubo limu, bantyenga emirembe gyonna, olw’obulungi bwabwe, n’obulungi bw’abaana baliddawo.” Yeremiya 32:39

Era nti,

“Ndikola nabo endagaano eteriggwaawo: siribaleka era sirirekeraawo kubakolera birungi, era ndibassaamu omwoyo oguntya, baleme kuddayo kunvaako” Yeremiya 32:40

Bwe tweyongerayo ekigambo kya Mukama kijjira Yeremiya.

“Bwati bw’ayogera Mukama, oyo eyakola ensi, Mukama eyagikola era n’agiteekawo, Mukama lye linnya lye:” Yeremiya 33:2

Era nti,

“Mumpite n’abayitaba ne mbalaga ebikulu ebitanoonyezeka bye mutamanyi.” Yeremiya 33:3

Era Mukama ayongera okulambika ebisuubizo eby’okuddawo kwa Yuda. Era agamba nti,

“Olwo ekibuga kino kirindetera okwongera okumanyika, n’essanyu, n’ettendo era n’ekitiibwa eri amawanga gonna ku nsi agaliwulira ebintu byonna ebirungi bye mbakolera; era balyewuunya bakankane olw’okukulaakulana n’emirembe gye nkiwa.” Yeremiya 33:9

Era Mukama ayogera nti mu bibuga bya Yuda n’emunguudo za Yerusaalemi muliddamu okuwulirwa nate…

“Amaloboozi ag’essanyu n’okujaguza, n’amaloboozi  g’omugole ne bba, n’amaloboozi gaabo abaleeta ekiweebwayo eky’okwebaza eri ennyumba ya Mukama.” Yeremiya 33:11a

Era amaloboozi galigamba nti,

“Mu mwebaze Mukama Katonda ow’Eggye, kubanga Mukama mulungi; okwagala kwe kubeerera emirembe gyonna.” Yeremiya 33:11b

Era Mukama ayogera ku kisuubizo ekirala nti,

“Mu nnaku ezo era mu kiseera ekyo ndireeta Ettabi ettukuvu mu lunyiriri lwa Dawudi era alikola eby’amazima era ebituufu mu nsi.” Yeremiya 33:15

Era nti,

“Lino lye linnya ly’aliyitibwa nti, Mukama Obutuukirivu bwaffe.” Yeremiya 33:16b

Era Mukama agamba nti,

“Bw’oba osobola okumenya endagaano yange n’emisana era n’endagaano yange n’ekiro, ne kiba nti emisana n’ekiro tebijja mu biseera byabyo ebyateekebwawo, awo endagaano yange ne Dawudi…eyinza okumenyebwa, Dawudi aleme kuddayo kuba na muntu wa mu nju ye okufuga ku ntebe ye ey’obwakabaka.” Yeremiya 33:20-21

Era nti,

“Ndizzaawo nate emikisa gyabwe, era n’embakwatirwa ekisa.” Yeremiya 33:26c

Bwe tweyongeraryo Mukama ayogera kuddembe ly’abaddu nti,

“Buli mwaka ogw’omusanvu buli omu ku mmwe ateekwa okuta Mwebbulaniya munne eyeetunda gy’ali. Bwakuweerezanga emyaka omukaaga, oteekwa okumuta agende.” Yeremiya 34:14

Nkwagadde n’okwagala okutaliggwaawo

“Nkwagadde n’okwagala okutaliggwaawo, kyenvudde nkusembeza gye ndi n’ekisa ekijjudde okwagala.” Yeremiya 31:3

Ekijjulo kyaffe leero kijjudde ebya ssava okuva mu Yeremiya 30-31.

Mukusosotola, Mukama ayogera nti,

“Ennaku zijja, lwe ndikomyawo abantu bange Isirayiri ne Yuda okuva mu busibe, mbazzeeyo mu nsi gye nawa bajjajjaabwe babeere omwo.” Yeremiya 30:3

Era nti,

“Ndi wamu nammwe era ndibalokola, wadde nga ndizikiriza ddala amawanga gye mbagobedde, siribazikiriza ddala mmwe.” Yeremiya 30:11a

Era nti,

“Ndibakangavvula n’obwenkanya, siribaleka nga temubonerezebbwa n’akatono.” Yeremiya 30:11b

Era Mukama agamba nti,

“Ndizzaawo eby’obugagga by’eweema za Yakobo era mbeere n’ekisa ku kifo kyammwe kye mwabeerangamu.” Yeremiya 30:18a

Era nti,

“Mu bo mulivaamu ennyimba ez’okwebaza era n’eddoboozi ery’okujaguza, ndibawa ekitiibwa tebalinyomebwa.” Yeremiya 30:19

Ayongerako nti,

“Noolwekyo munaabeeranga bantu bange, nange n’abeeranga Katonda wammwe.” Yeremiya 30:22

Bwe tweyongerayo, Mukama  agamba nti,

“Mu kiseera ekijja, ndiba Katonda w’ebika byonna ebya Isirayiri, era balibeera bantu bange.” Yeremiya 31:1

Era nti,

“Abantu abawona ekitala baliraba ekisa mu ddungu. Ndijja n’empa Isirayiri ekiwummulo.” Yeremiya 31:2

Era kitegezeebwa nti, Mukama yagamba nti,

“Nkwagadde n’okwagala okutaliggwawo, kyenvudde nkusembeza gye ndi n’ekisa ekijjudde okwagala.” Yeremiya 31:3

Era Mukama agamba nti,

“Muyimbe n’essanyu olwa Yakobo muleekaanire waggulu olw’ensi esinga zonna.” Yeremiya 31:7

Era kukukomyawo abantu be, Mukama agamba nti,

“Ndibakulembera ku mabbali g’emigga mu kkubo eggolokofu mwe batalyesittalira kubanga nze Kitaawe wa Isirayiri, era Efulayimu ye mutabani wange omubereberye.” Yeremiya 31:9

Era amawanga galagirwa okwegera ekigambo kya Mukama nti,

“Oyo eyasaasaanya Isirayiri alibakuŋŋaanya era alirabirira ekisibo kye ng’omusumba w’endiga.” Yeremiya 31:10b

Era nti,

“Balibeera ng’ennimiro efukiriddwa obulungi, era tebalyongera kulaba nnaku.” Yeremiya 31:12c

Era nti,

“Okukaaba kwabwe ndikufuula essanyu; ndibawa emirembe n’essanyu okusinga ennaku.” Yeremiya 31:13

Era Efulayimu awulirwa ng’akungubaga nti,

“Wankangavvula ng’ennyana endalu era kaakano nkangavvuddwa. Nziza, n’akomawo gy’oli kubanga ggwe Mukama Katonda wange.” Yeremiya 31:18

Era Mukama ayogera nti,

“Efulayimu si mwana wange omwagalwa, omwana wange gwe nsanyukira? Wadde nga ntera okumunenya naye nkyamujjukira. Noolwekyo omutima gwange gumuyaayaanira; nnina ekisa kingi gy’ali.” Yeremiya 31:20

Era ku abo Mukama balikomyawo okuva mu busibe, agamba nti,

“Abalumwa ennyonta ndibanywesa, nzizeemu amaanyi abazirika.” Yeremiya 31:25

Era nti,

“…ndibalabirira nga bazimbibwa era nga basimbibwa.” Yeremiya 31:28b

Era mubiro ebyo kigambibwa nti,

“Buli muntu alifa olw’obutali butuukirivu bwe ye.” Yeremiya 31:30

Era Mukama agamba nti,

“Ekiseera kijja, lwe ndikola endagaano empya n’ennyumba ya Isirayiri era n’ennyumba ya Yuda.” Yeremiya 31:31

Era nti,

“Eno y’endagaano gye nnaakola n’ennyumba ya Isirayiri mu kiseera ekyo… Nditeeka amateeka gange mu birowoozo byabwe, ne ngawandiika ku mitima gyabwe. Ndibeera Katonda waabwe, nabo balibeera bantu bange.” Yeremiya 31:33

Era nti,

“Omuntu taliddayo kuyigiriza muliraanwa we, oba omusajja Muganda we ng’agamba nti, ‘Manya Mukama,’ Kubanga bonna balimmanya, okuva ku asokerwako wansi okutuuka ku akomererayo waggulu.” Yeremiya 31:34a

Era nti,

“Kubanga ndisonyiwa obutali butuukirivu bwabwe n’ekibi kyabwe ne ssiddamu kukijjukira.” Yeremiya 31:34b

Era Mukama ayogera nti,

“Oyo ateekawo enjuba okwaka emisana, n’alagira omwezi n’emmunyeenye okwaka ekiro, asiikuula ennyanja amayengo gaayo ne gawuluguma; Mukama Katonda ow’Egye lye linnya lye.” Yeremiya 31:35

Ekibego ekisembayo, Mukama agamba nti,

“Okuggyako ng’eggulu lisobola okupimibwa n’emisingi gy’ensi wansi okunoonyezebwa, olwo lw’endigoba ezzadde lya Isirayiri olw’ebyo bye bakoze.” Yeremiya 31:37

 

 

Nnina enteekateeka ez’okubakulaakulanya, ez’okubawa essuubi era n’obulamu obw’omu maaso!

“Kubanga mmanyi enteekateeka ze nnina gye muli, enteekateeka ez’okubakulaakulanya so si okubakolako akabi, enteekateeka ez’okubawa essuubi era n’obulamu obw’omu maaso.Yeremiya 29:11

Emmeeza yaffe leero ejjudde ebya ssava okuva mu Yeremiya 26-29.

Bwetujjako akawuwo, Yeremiya aweebwa obubaka eri abantu ba Yuda ate era tulaba nga atiisibwatiisibwa okuttibwa.

Mukama agamba Yeremiya nti,

“Bagambe byonna bye nkulagira; tobaako ky’olekayo. Oboolyawo banaawulira, buli muntu n’akyuka okuva mu makubo ge amabi. Olwo nejjuse nneme kubaleetako kikangabwa ntegeka olw’okwonoona kwabwe.” Yeremiya 26:2c-3

Era Mukama ategeeza abantu ba Yuda okuyita mu Yeremiya nti,

“Bwe mutampulirize ne mugoberera amateeka gange ge mbawadde, era bwe mutaawulirize bigambo bya baddu bange bannabi, be mbatumidde emirundi emingi wadde nga temubafuddeeko, ndifuula enju eno nga Siiro era n’ekibuga kino ng’ekintu eky’okukolimirwa mu mawanga ag’ensi.” Yeremiya 26:4-6

Wabula Yeremiya bwamala okwogera ebigabyo ebyamutumwa,

…ne bamukwata ne bagamba nti, “Oteekwa okufa!…” Yeremiya 26:8d

Era tulaba abakungu ba Yuda oluvanyuma lw’okuwuulira ebigambo ebyo, ne bambuka mu nnyumba ya Mukama. Era bakabona ne bannabbi ne bagamba nti,

“Omusajja ono asaana kusalirwa musango gwa kufa kubanga ayogedde eby’obunnabbi ebibi ku kibuga kino. Mukiwulidde n’amatu gammwe gennyini.” Yeremiya 26:8d

Era Yeremiya ayogera nga bwali mumikono gyabwe, era nti baddembe okumukolako kye balowooza nga kye kirungi era ekituufu. Wabula abakungu bagamba bakabona ne bannabbi nti,

“Omusajja ono tasaana kusalirwa musango gwa kufa! Ayogedde naffe mu linnya lya Mukama Katonda waffe.” Yeremiya 26:16b

Era tulaba Yeremiya ng’awolerezebwa era natattibwa.

Mukibego ekirala, Yeremiya aweebwa Mukama obubaka eri  bakabaka ba Edomu, ne Mowaabu, ne Ammoni, ne Tuulo ne Sidoni… nti,

“N’amaanyi gange amangi n’omukono ogugoloddwa natonda ensi n’abantu baamu n’ensolo ezigiriko, era ngiwa omuntu yenna gwe njagala. Kakaano ŋŋenda kuwaayo amawanga gammwe eri omuddu wange Nebukadduneeza kabaka w’e Babulooni, n’ensolo ez’omu nsiko nzija kuziteeka wansi we.” Yeremiya 27:5-6

Wabula Mukama ayogera ku mawanga oba obwakabaka obutaliwereza Nebukadduneeza nti,

“…nzija kubonereza ensi eyo n’ekitala, n’ekyeya, ne Kawumpuli… okutuusa lwe ndigizikiriza n’omukono gwange.” Yeremiya 27:8b

Era Mukama abalabula nti,

“Noolwekyo bannabi bammwe, n’abalaguzi, n’abavvuunuzi b’ebirooto, temubawuliriza wadde abalogo wadde abafumu ababagamba nti, ‘temulibeera baddu ba kabaka w’e Babulooni.’” Yeremiya 27:9

Era obubaka bwe bumu butegezebwa Zeddekiya kabaka wa Yuda. Era amulabula obutawuliriza bigambo bya bannabbi abagamba nti talibeera muddu wa kabaka w’e Babulooni.  Era Yeremiya agamba bakabona n’abantu bonna nti,

“Temubawuliriza. Muweereze kabaka w’e Babulooni, bubeere balamu.” Yeremiya 27:17

Bwe tweyongerayo tulaba kananiya nnabbi ow’obulimba. Era gyebiggweera, Yeremiya amugamba nti,

“Wuliriza, Kananiya! Mukama tannakutuma naye ggwe owalirizza eggwanga lino okwesiga obulimba.” Yeremiya 28:15

Era Mukama awa obubaka ku Kananiya nti,

“Ndikumpi okukuggya ku nsi. Omwaka guno gwennyini ogenda kufa, kubanga oyigiriza abantu okujeemera Mukama.” Yeremiya 28:16

Mu kibego kyaffe ekisembayo, tulaba ebbaluwa eri abawaŋŋanguse. Eri abakadde, n’eri bakabona, ne bannabbi n’abantu bonna Nebukadduneeza be yali atutte mu buwaŋŋanguse. Mukama agamba nti,

“Mwezimbire amayumba mutuule omwo; mulime ennimiro mulye ebibala byamu. Muwase muzaale abaana aboobulenzi n’aboobuwala; muwasize batabani bammwe abakazi, ne bawala bammwe mubafumbize, nabo bazaale abaana abalenzi n’abawala. Mweyongere obungi eyo, temukendeera.” Yeremiya 29:5-6

Ayongerako nti,

“Era munoonye emirembe n’okukulaakulana kw’ekibuga gye mbatutte mu buwaŋŋanguse. Musabenga Mukama, ekibuga mukisabire kubanga bwe kikulaakulana nammwe mujja kukulaakulana.” Yeremiya 29:7

Era nti,

“Emyaka nsanvu nga giweddeko e Babulooni, ndijja gye muli ntuukirize ekisuubizo kyange eky’ekisa mbakomyewo mu kifo kino.” Yeremiya 29:10

Era nti,

“Kubanga mmanyi enteekateeka ze nnina gye muli, enteekateeka ez’okubakulaakulanya so si okubakolako akabi, enteekateeka ez’okubawa essuubi era n’obulamu obw’omu maaso.Yeremiya 29:11

Era nti,

“Awo mulimpita ne mujja ne munsaba, nange ne mbawulira… Mulinnoonya ne mundaba bwe mulinnoonya n’omutima gwammwe gwonna.Yeremiya 29:12-13

Ekigambo kyange tekiri nga muliro?

“Nnabbi alina ekirooto ayogere ekirooto kye, n’oyo alina ekigambo kyange akyogere mu bwesigwa. Kubanga ebisusunku birina nkolagana ki n’eŋŋaano?” Yeremiya 23:28

Ekijjulo kyaffe leero kijjudde ebyassava okuva mu: Yeremiya 23-25. 

Bwe tujjako akawuwo, Mukama Katonda ayogera nti,

“Zibasanze abasumba abazikiriza era abasaasaanya endiga z’ekisibo kyange!” Yeremiya 23:1

Era Mukama agamba nti,

“Ennaku zijja, lwe ndiyimusiza Dawudi Ettabi ettukuvu, Kabaka alikulembera n’amagezi akole ebituufu eby’obwenkanya mu nsi,”  Yeremiya 23:5

Era nti,

“Mu mirembe gye, Yuda alirokolebwa ne Isirayiri alibeera mu mirembe. Lino lye linnya lye balimuyita: Mukama OBUTUUKIRIVU BWAFFE.”  Yeremiya 23:6

Wabula kyogerwa nti,

“Ensi ejjudde abenzi; olw’ekikolimo ensi esigadde nkalu era n’amalundiro g’omu ddungu meereere. Bannabbi bagoberera amakubo amabi era bakozesa obuyinza bwabwe mu butali bwenkanya.” Yeremiya 23:10

Era Mukama Katonda agamba nti,

“Nnabi ne kabona bombi tebalina Katonda, ne mu yeekaalu yange mbasanze nga bakoleramu ebibi… Noolwekyo amakubo gaabwe gajja kuseerera…” Yeremiya 23:11-12

Ayongerako nti,

“Era ne mu bannabbi ba Yerusaalemi ndabye ekintu ekibi ennyo. Bakola eby’obwenzi ne batambulira mu bulimba. Bagumya abo abakozi b’ebibi ne wataba n’omu ava mu kwonoona kwe.” Yeremiya 23:14

Era Ku bannabi Mukama agamba nti,

“Temuwuliriza bannabbi bye babategeeza: Babajjuza essuubi ekyamu. Boogera ebirooto ebiva mu mitima gyabwe, so si ebiva mu kamwa ka Mukama Katonda.” Yeremiya 23:16

Era ayongerako nti,

“Situmanga bannabi bano songa bagenda badduka n’obubaka buno, era sogeranga nabo, songa bategeeza obunnabbi.” Yeremiya 23:21

Wabula Mukama agamba nti,

“Naye singa bayimirira mu maaso gange, bandibulidde abantu bange ebigambo byange, era bandibaggye mu makubo gaabwe amabi era ne mu bikolwa byabwe ebibi.” Yeremiya 23:22

Era Mukama abuuza nti,

“Ndi Katonda abeera okumpi wokka, so si abeera awala?… Omuntu ayinza okwekweka mu bifo eby’ekyama ne sisobola kumulaba?…Sijjuza eggulu  n’ensi?” Yeremiya 23:23-24

Era Mukama ayogera ku bannabbi aboogera eby’obulimba mu linnya lye nti,

“Nnabbi alina ekirooto ayogere ekirooto kye, n’oyo alina ekigambo kyange akyogere mu bwesigwa. Kubanga ebisusunku birina nkolagana ki n’eŋŋaano.” Yeremiya 23:28

Era nti,

“Ekigambo kyange tekiri nga muliro, ng’ennyondo eyasaayasa olwazi?” Yeremiya 23:29

Ayongerako nti,

“Ddala ddala ndi mulabe w’abo abawa obunnabbi bw’ebirooto ebikyamu. Babyogera ne babuza abantu bange n’obulimba bwabwe obutaliimu, ate nga saabatuma wadde okubateekawo. Tebalina kye bayamba bantu bano n’akatono.” Yeremiya 23:32

Bwe tweyongerayo tulaba Mukama nga ayogera ku bawaŋŋanguse b’omu Yuda abatwalibwa mu nsi ey’Abakaludaaya nti,

“Amaaso gange gajja kubalabirira olw’obulungi bwabwe, era nzija kubazimba era nneme kubamenyaamenya: nzija kubasimba nneme kubakuula.” Yeremiya 24:6

Era nti,

“Ndibawa omutima bammanye, nti nze Mukama. Balibeera bantu bange, nange ndibeera Katonda waabwe, kubanga balidda gye ndi n’omutima gwabwe gwonna.” Yeremiya 24:7

Era Bwetweyongerayo tulaba ekyaleta emyaka ensavu egy’obusibe,

“Newaakubadde nga Mukama abaweerezza bannabbi be emirundi mingi, temuwulirizza wadde okufaayo.” Yeremiya 25:4

Era nti,

“Naye temwampuliriza, mwansunguwaza n’ekyo kye mwakola n’emikono gyammwe, era ne mwereetera akabi.” Yeremiya 25:7

Era nti,

“Ndibagobako eddoboozi ery’essanyu era n’okujaguza, eddoboozi ery’awasa omugole n’ery’omugole.” Yeremiya 25:10

Era nti,

“Ensi eno yonna ejja kufuuka matongo, n’amawanga gano gajja kuweereza kabaka w’e Babulooni emyaka nsanvu.” Yeremiya 25:11

Wabula Mukama agamba nti,

“Naye emyaka ensanvu bwe giriggwako, ndibonereza kabaka w’e Babulooni n’eggwanga lye, ensi ya Babulooni lw’ekibi kyabwe, ngifuule matongo emirembe gyonna .” Yeremiya 25:12

 

Mukama ali nange ng’omulwanyi ow’entiisa

Naye Mukama ali nange ng’omulwanyi ow’entiisa… Yeremiya 20:11a

Ekijjulo kyaffe leero kijjudde ebya ssava okuva mu: Yeremiya 18-22. 

Bwetujjako akawuwo, tulaba nga Mukama  asindika nnabbi Yeremiya mu nnyumba y’omubumbi. Era ekigambo kya Mukama nekimujjira nga kigamba  nti,

“Okufaanana ng’ebbumba mu mukono gw’omubumbi, bwe mutyo bwe muli mu ngalo zange, ggwe ennyumba ya Isirayiri.” Yeremiya 18:6b

Era Mukama ayogera nti,

“Ekiseera kyonna bwe nnangirira nti eggwanga oba obwakabaka bwa kusiguukululwa, okumenyebwa era n’okuzikirizibwa, era singa eggwanga lye nalabula lyenenya ebibi byalyo, olwo ndyejjusa ne sibatuusaako kabi ke nnali ŋŋambye okubakola.” Yeremiya 18:7-8

Era Mukama alabula abantu ba Yuda nti,

“Laba ntekateeka okubatuusaako ekikangabwa era nteesezza okubakola akabi. Kale muve mu makubo gammwe amabi, buli omu ku mmwe, mukyuse enneyisa yammwe n’ebikola byammwe.” Yeremiya 18:11

Wabula abantu ba Yuda bagenda mumaaso okukakanyala omutima. Mukama kyava agamba nti,

“Ndibalaga mabega so si maaso gange ku lunaku olw’okulabirako ennaku.” Yeremiya 18:17b

Bwetweyongerayo, tulaba nga abantu ba Yuda bateesa okuwakanya Yeremiya. Ekintu kino kyanyiiza Yeremiya, era nasaba Mukama aleme okubasonyiwa ebyonoono byabwe.

Bwetweyongerayo Mukama ayogera nti,

“Ndireeta ekikangabwa mu kifo kino ekiriwaawaaza buli kutu. Kubanga banvuddeko ekifo kino ne bakifuula ekya bakatonda abalala…” Yeremiya 19:3c-4a

Era Yeremiya oluvanyuma ayimirira mu mbuga ya yeekaalu ya Mukama n’agamba abantu bonna nti,

“Bwati bw’ayogera Mukama ow’Eggye, Katonda wa Isirayiri nti, ‘Muwulirize, ndireeta ku kibuga kino ne ku bubuga obukyetoolodde buli kikangabwa kyonna kye nakirangirirako, kubanga baakakanyaza ensingo zaabwe ne batagondera bigambo byange.’” Yeremiya 19:15

Bwetweyongerayo tulaba Yeremiya ng’akubibwa era n’asibibwa mu nvuba…

Era Yeremiya yemulugunya nti,

“Ayi Mukama, wannimba era n’ennimbibwa, wansinza amaanyi n’ompangula. Nvumibwa okuva ku makya okuzibya obudde, buli muntu ankudaalira.” Yeremiya 20:7

Era nti,

“Kale ekigambo kya Mukama kindeetera kuvumwa na kusekererwa buli lunaku.” Yeremiya 20:8b

Era nti,

Naye bwe ŋŋamba nti, “sijja kumwogerako oba okwongera okwogera mu linnya lye,ekigambo kye mu mutima gwange kiri ng’omuliiro ogwaka, ogukwekeddwa mu magumba gange. Nkooye okukizibiikiriza era ddala sisobola. Yeremiya 20:9

Era nti,

Mikwano gyange bonna banninda ngwe, nga bagamba nti, “oboolyawo anasobya…” Yeremiya 20:10b

Wabula ayatula nti,

Naye Mukama ali nange ng’omulwanyi ow’entiisa, kale abanjigganya kyebaliva bagwa ne bataddayo kuyimirira nebataddayo kuyimirira. Yeremiya 20:11a

Era nti,

Ayi Mukama Katonda ow’Eggye oyo agezesa abatuukirivu, alaba ebiri munda mu mitima era n’ebirowoozo, kale leka ndabe bw’obawoolerako eggwanga, kubanga ensonga zange nzitadde mu mikono gyo. Yeremiya 20:12

Era nti,

Muyimbire Mukama Katonda. Mumuwe ettendo. Kubanga awonyezza obulamu bw’omunaku mu mikono gy’abo abakozi b’ebibi. Yeremiya 20:13

Era Yeremiya yebuuza nti,

Lwaki nava mu lubuto okulaba emitawaana n’obuyinike era ennaku zange ne nzimala mu buswavu. Yeremiya 20:18

Bwetweyongerayo, Yeremiya addamu ababaka abaali bava ewa kabaka Zeddekiya kukulumbibwa kwa Nebukadduneeza okwali kwalagulwa. Era Yeremiya ayogera nti,

‘Bwati Mukama bw’ayogera nti: Laba mbateereddewo ekkubo ery’obulamu era n’ekkubo ery’okufa. Buli anaasigala mu kibuga kino ajja kufa ekitala, oba enjala oba kawumpuli. Naye buli afuluma ne yeewaayo eri abakaludaaya ababazingizza, ajja kuba mulamu, era anaawonya obulamu bwe…’ Yeremiya 21:8-9

Era Mukama ayogera eri ennyumba ya Yuda ey’obwakabaka, ngayagala basale emisango mu bwenkanya, era banunule ababa banyagiddwa ababanyigiriza obusungu bw buleme okuvaayo okubookya ng’omuliro.

Era Mukama abanga nti tebeyinula. Ayogera nti,

Nzija kubabonereza ng’ebikolwa byammwe bwe biri, era ndikoleeza omuliiro mu kibira kyammwe, gwokye byonna ebikyetoolodde. Yeremiya 21:14

Bwetweyongerayo tulaba omusango eri bakabaka ababi. Era Mukama ayogera nti,

“…Musale emisango egy’ensonga, mukole ebituufu. Anyagiddwako ebibye mu muggye mu mukono gw’oyo amujooga…” Yeremiya 22:3a

Ayongerako nti,

“… Temukola kibi oba eby’obukambwe eri omugwira, newaakubadde nnamwandu so temuyiwa musaayi gw’abantu abataliiko musango mu kifo kino.” Yeremiya 22:3b

Era ayogera nti,

‘Naye bwe mutaagondera biragiro bino, nneelayirira ku lwange nti Ekifo kino kijja kufuuka matongo,’  Yeremiya 22:5

Era Mukama ayogera ku butaali bwenkanya…

“Naye amaaso gammwe n’emitima gyammwe biri ku magoba ag’obukuusa, ne ku kuyiwa omusaayi ogutaliiko musango ne ku kunyigiriza ne ku kunyaga.” Yeremiya 22:17

Ayi Mukama essuubi lya Isirayiri, bonna abakuvaako baliswala

“Ayi Mukama essuubi lya Isirayiri, bonna abakuvaako baliswala… kubanga bavudde ku Mukama, oluzzi olw’amazzi amalamu.” Yeremiya 17:13

Omuwumbo gwaffe leero gulimu ebya ssava ebijjiddwa mu:  Yeremiya 14-17

Mu kusosootoola, tulaba ekyeya n’enjala mu Yerusalemi. Era kyogerwa nti,

“Wadde obutali butuukirivu bwaffe butulumiriza, Ayi Mukama, baako ky’okola olw’erinnya lyo. Kubanga tuzze ennyuma emirundi mingi, tukwonoonye nnyo.” Yeremiya 14:7

Era nti,

“Ayi ggwe essuubi lya Isirayiri, Omulokozi waalyo mu biseera eby’okulabiramu ennaku, lwaki oli ng’omuyise mu nsi, ng’omutambuze asula ekiro ekimu.” Yeremiya 14:8

Era nti,

“Ggwe, Ayi Mukama Katonda, oli wakati mu ffe, era tuyitibwa linnya lyo. Totuleka.” Yeremiya 14:9b

Wabula Mukama agamba Yeremiya nti,

“Tosabira bantu bano kubeera bulungi.” Yeremiya 14:11

Era nti,

“Newaakubadde nga basiiba, sijja kuwulira kukaaba kwabwe, era wadde bawaayo ebiweebwayo ebyokebwa n’ebiweebwayo eby’empeke, sijja kubikkiriza. Naye nnaabazikiriza n’ekitala, n’enjala ne kawumpuli.” Yeremiya 14:12

Wabula bwe tweyongerayo tulaba okwegayirira. Kyogerwa nti,

“Ayi Mukama tukkiriza ebibi byaffe era n’obutali butuukirivu  bwa bajjajjaffe, kubanga ddala twayonoona gy’oli.” Yeremiya 14:20

Era,

“Olw’erinnya lyo totugoba, tovumaganyisa ntebe yo ey’obwakabaka ey’ekitiibwa. Jjukira endagaano gye wakola naffe, togimenya, gituukirize.” Yeremiya 14:21

Era omwegayirizi yebuuza era ne yeddamu,

“Waliwo ku bakatonda ababajje banaggwanga asobola okutonnyesa enkuba? Eggulu ku bw’alyo lisobola okuleeta enkuba? Nedda, wabula ggwe, Ayi Mukama Katonda waffe. Noolwekyo essuubi lyaffe liri mu ggwe, kubanga ggwe okola bino byonna” Yeremiya 14:22

Bwe tweyongerayo tulaba Yeremiya nga yeekaabirako eri Mukama. Agamba nti,

“Ayi Mukama ggwe omanyi byonna. Nzijukira ondabirire. ” Yeremiya 15:15

Ayongerako nti,

“Ebigambo byo bwe byanzijjira, ne mbirya, byali bya ssanyu era okujaguza kw’omutima gwange.” Yeremiya 15:16

Era Mukama agamba nti,

“Bwe muneenenya, ndibakomyawo musobele okumpeereza; bwe mulyogera ebigambo esibaana so si ebitasaanidde, bulibeera boogezi bange. Leka abantu bano be baba bajja gy’oli, so si ggwe okugenda gye bali.” Yeremiya 15:19

Era Mukama ayogera nti,

“Balikulwanyisa naye tebalikuwangula, kubanga ndi naawe, okununula, n’okukulokola.” Yeremiya 15:20b

Bwe tweyongerayo, Mukama ayogera ku kabi akali kagenda okutuuka ku Isirayiri. Era nagaana Yeremiya okuwasa.

Era Mukama ayogera nti,

“Amaaso gange galaba buli kyebakola, tebinkwekeddwa wadde obutali butuukirivu bwabwe okunkwekebwa.” Yeremiya 16:17

Noolwekyo,

“Ndibasasula olw’obutali butuukirivu bwabwe n’olwekibi kwabwe emirundi ebbiri.” Yeremiya 16:18

Era kyogerwa nti,

“Ayi Mukama, amaanyi gange era ekigo kyange, ekiddukiro kyange mu biro eby’okulabiramu ennaku.” Yeremiya 16:19

 

Bwe tweyongerayo, Mukama agamba nti,

“Akolimiddwa oyo eyeesiga omuntu era eyeesiga omubiri okuba amaanyi ge, ear alina omutima oguva ku Katonda.” Yeremiya 17:5

Era nti,

“Naye alina omukisa omusajja eyeesiga Mukama, nga Mukama ly’essubi lye. Ali ng’omuti ogusimbiddwa awali amazzi, ne gulandiza emirandira gyagwo ku mabbali g’omugga, nga wadde omusana gujja, tegutya n’amakoola gaagwo tegawotoka, so tegulyeralikirira mu mwaka ogw’ekyeya era teguliremwa kubala bibala.” Yeremiya 17:7-8

Era ku mutima kyogerwa nti,

“Omutima mulimba okusinga ebintu byonna, era gulwadde endwadde etawonyezeka, ani ayinza okugutegeera?” Yeremiya 17:9

Era nti,

“Nze Mukama nkebera omutima, ngezesa emmeeme, okuwa buli muntu ng’amakubo ge bwe gali, ng’ebikolwa bye bwe biri.” Yeremiya 17:10

Era kyogerwa nti,

“Ayi Mukama essuubi lya Isirayiri, bonna abakuvaako baliswala… kubanga bavudde ku Mukama, oluzzi olw’amazzi amalamu.” Yeremiya 17:13

Era nti,

“Mponya, Ayi Mukama, nange nnaawona, ndokola nange nnaalokoka, kubanga ggwe gwe ntendereza.” Yeremiya 17:14

 

 

Omuntu si y’aluŋŋamya amakubo ge

“ Mmanyi Ayi Mukama Katonda ng’obulamu bw’omuntu si bubwe, omuntu si y’aluŋŋamya amakubo ge. Nnuŋŋamya…” Yeremiya 10:23, 24a

Ebyassava byaffe leero bigyiddwa mu: Yeremiya 10-13. 

Mukwanjuluza, Mukama Katonda ayogera eri ennyumba ya Isirayiri nti,

“Temugobereranga makubo g’amawanga oba okweralikirira obubonero obw’oku kuggulu, kubanga amawanga ge byeralikirira.” Yeremiya 10:2

Era Mukama ayogera ku eri Isirayiri ku bakatonda b’amawanga nti,

“Tobatya, tebayinza kukukola kabi konna, wadde okukola akalungi n’akamu.” Yeremiya 10:5b

Wabula kyogerwa ku Katonda w’eggulu nti,

“Naye Mukama ye Katonda ddala, ye Katonda omulamu, era Kabaka ow’emirembe gyonna. Bwasunguwala ensi ekankana, amawanga tegasobola kugumira busungu bwe” Yeremiya 10:10

Era Mukama agamba Yeremiya okwogera nti,

“Bakatonda abataakola ggulu na nsi ba kuzikirira bave kun nsi ne wansi w’eggulu.” Yeremiya 10:11

Wabula ku Mukama kyogerwa nti,

“Oyo Katonda Omugabo gwa Yakobo tali ng’ebyo, ye mutonzi w’ebintu byonna, era owa Isirayiri, eggwanga ery’omugabo gwe, Mukama Katonda ow’Eggye lye linnya lye.” Yeremiya 10:16

Era Ku basumba kyogerwa,

“Kubanga abasumba bafuuse ng’ensolo tebakyebuuza ku Mukama. Noolwekyo tebakulaakulana era endiga zaabwe zonna zisaasaanye.” Yeremiya 10:21

Era Yermiya asaba nti,

“ Mmanyi Ayi Mukama Katonda ng’obulamu bw’omuntu si bubwe, omuntu si y’aluŋŋamya amakubo ge. Nnuŋŋamya…” Yeremiya 10:23, 24a

Era Mukama ayogera eri abantu ba Yuda nti,

“Akolimiddwa omuntu atagondera bigambo by’endagaano eno bye nalagira bakitammwe bwe nabaggya mu nsi y’e Misiri, okuva mu kikoomi ky’omuliro.” Yeremiya 11:3

Era Mukama agamba nti,

“Muwulire ebigambo by’endagaano era mubikole.” Yeremiya 11:6b

Era ayongerako nti,

“Okuva lwe naggya bajjajjammwe mu Misiri okutuusa leero, mbakutidde emirundi mingi nga mbagamba nti,  muŋŋondere.” Yeremiya 11:7

Era Mukama ayogera eri Yeremiya nti,

“Noolwekyo tosabira bantu bano, tobakaabiririra wadde okubegayiririra kubanga siribawulira mu biro lwe baligwako akabi.” Yeremiya 11:14

Era ku Mukama Yeremiya ayogera nti,

“Naye ggwe Mukama Katonda ow’Eggye, alamula mu bwenkanya, agezesa omutima n’ebirowoozo, kandabe bw’obawoolera eggwanga, kubanga ggwe gwenkwasizza ensonga yange.” Yeremiya 11:20

Bwe tweyongerayo, Yeremiya ayogera nti,

“Bulijjo oba mutuukirivu, Ayi Mukama Katonda, bwe nkuleetera ensonga yange. Noolwekyo nnaaleeta ensonga yange gy’oli.” Yeremiya 12:1a

Yerimiya abuuza nti,

“Lwaki abakozi b’ebibi baba mu kwesiima? Lwaki abalimbalimba bonna baba mu bulamu obw’emirembe?” Yeremiya 12:1b

Wabula Mukama addamu nti,

“Bw’oba owakana n’abaddusi b’embiro n’oggwaamu amaanyi oyinza otya okudduka n’embalaasi?  Obanga mu nsi enterevu weesitadde n’ogwa bugwi, onoosolayo otya mu nsiko y’oku Yoludaani?” Yeremiya 12:5

Bwe tweyongerayo, Mukama ayogera n’ennaku nti,

“Njabulidde ennyumba yange, ne ndeka omugabo gwange; mpaddeyo abo emmeeme yange b’eyagala, mu mikono gy’abalabe baabwe.” Yeremiya 12:7

Era nti,

“Abantu bange be nalonda banfuukidde ng’empologoma eri mu kibira; empulugumira, noolwekyo mbakyaye.” Yeremiya 12:8

Era ayogera nti,

“Basize eŋŋaano, ne bakungula amaggwa. Bakooyedde bwereere ne bataba na kebaggyamu. Bakwatiddwa ensonyi olw’ebibala bye bakunguddeyo, kubanga ebyo Mukama y’abikoze olw’obusungu bwe obungi.” Yeremiya 12:13

Wabula Mukama ayogera nti,

“Naye nga mmaze okubasiguukululamu, ndibakwatira ekisa ne mbakomyawo buli omu eri omugabo gwe mu nsi ye.” Yeremiya 12:15

Era Kigambibwa nti,

“Mukama Katonda wo mugulumize nga tannaleeta kizikiza, nga ebigere byo tebinneesittala ku nsozi ezikutte ekizikiza. Musuubira ekitangaala, naye ajja okukifuulamu ekisiikirize eky’okufa akikyuse kibe ekizikiza ekikutte ennyo.” Yeremiya 13:16

 

Nze Mukama akola eby’ekisa n’eby’ensonga n’eby’obutuukirivu mu nsi

“Omusajja omugezi aleme kwenyumiririza mu magezi ge, oba omusajja ow’amaanyi okwenyumiririza mu maanyi ge oba omugagga mu bugagga bwe. Naye leka oyo eyeenyumiriza yeenyumirizenga mu kino: antegeera era ammanyi, nti nze Mukama akola eby’ekisa n’eby’ensonga n’eby’obutuukirivu mu nsi, kubanga mu byo mwensanyukira.” Yeremiya 9:23-24

Ekijjulo kyaffe leero kijjudde ebya ssava okuva mu: Yeremiya 7-9. 

Bwetujjako akawuwo, tulaba nga Mukama ow’Eggye, Katonda wa Isirayiri ayogeera eri abantu ba Yuda okuyita mu nnabbi Yeremiya. Agamba nti,

“Mulongoose amakubo gammwe n’ebikolwa byammwe, nange ndibalekera ekifo kino ne mubeeramu.” Yeremiya 7:3b

Era Mukama abuuza nti,

“Munabba ne mutta, ne mukola obwenzi ne mulayira eby’obulimba, ne mwoteza obubaane eri baali Baali, ne mutambula okugoberera bakatonda abalala be mutamanyanga; ne mulyoka mujja muyimirira mu maaso gange mu nnyumba eno, eyitibwa Erinnya lyange, ne  mugamba nti, ‘Tuli bulungi, tuli bulungi,’ ne mulyoka mukola eby’emizizo byonna?” Yeremiya 7:9-10

Era ayongerako nti,

“Mulowooza nti ennyumba eno eyitibwa ennyumba yange, mpuku y’abanyazi?” Yeremiya 7:11

Era Mukama agamba Yeremiya nti,

“Noolwekyo tosabira bantu abo wadde okubegayirira okubawolereza, kubanga sikuwulire.” Yeremiya 7:16

Era Mukama kyava agamba nti,

“Laba obusungu bwange n’ekiruyi kyange bijja kufukibwa ku kifo kino, ku bantu ne ku nsolo, ku miti egy’omu ttale era ne ku bibala eby’omu ttaka; bujja kubuubuuka era tebujja kukoma.” Yeremiya 7:20

Era  Mukama ajjukiza kyeyalagira abaana ba Isirayiri nga baava e Misiri nti,

“Muŋŋondere, nange nnaabeera Katonda wammwe, nammwe munaabeera bantu bange. Mutambulire mu makubo gonna ge mbalagira, mulyoke mubeere bulungi.” Yeremiya 7:23

Wabula Mukama agamba nti Isirayiri teyamuwuliriza wadde okumusaako omwoyo. Era Mukama agamba Yeremiya abagambe nti,

“Lino ly’eggwanga eritagondera Mukama Katonda waalyo oba okufaayo ku kugololwa. Amazima gabulawo, tegali ku mimwa gyabwe.” Yeremiya 7:28

Era Mukama ayogera nti,

“Omuntu bw’agwa, tayimuka? Oba omuntu bwava mu kkubo ettuufu, takyusa n’adda? Kale lwaki abantu bange bano banvaako ne bagendera ddala.” Yeremiya 8:4-5

Era Mukama agamba nti,

“Bonna ba mululu okuva ku asembayo wansi okutuuka ku akomererayo waggulu, nnabbi ne kabona bonna balimba ne babba abantu.” Yeremiya 8:10b

Era Mukama abuuza nti lwaki ensi eyonoonese ng’eddungu ne wataba agiyitamu. Addamu nti,

“Kubanga balese amateeka gange, ge nabateekerawo. Tebaŋŋondedde wadde okugoberera amateeka gange.” Yeremiya 9:13

Era Mukama ayogera nti,

“Omusajja omugezi aleme kwenyumiririza mu magezi ge, oba omusajja ow’amaanyi okwenyumiririza mu maanyi ge oba omugagga mu bugagga bwe. Naye leka oyo eyeenyumiriza yeenyumirizenga mu kino: antegeera era ammanyi, nti nze Mukama akola ebyekisa n’ebyensonga n’eby’obutuukirivu mu nsi, kubanga mu byo mwensanyukira.” Yeremiya 9:23-24

 

 

Buuza ekkubo eddungi gye liri, era otambulire omwo

“Yimirira mu masaŋŋanzira otunule. Buuza amakubo ag’edda, buuza ekkubo eddungi gye liri, era otambulire omwo, emmeeme yammwe erifuna ekiwummulo.” Yeremiya 6:16

Ekijjulo kya leero kijjudde ebirungo okuva mu: Yeremiya 4-6. 

Bwetujjako akawuwo, Mukama Katonda agamba Yeremiya nti,

“Bw’oba odda, ggwe Isirayiri,” bw’ayogera Mukama, “eri nze gy’olina okudda.” Yeremiya 4:1

Era ayongerako nti,

“Mulime ennimiro zammwe ezitali nnime, temusiga mu maggwa. Mukoowoole Mukama, mweweeyo mutukuze emitima gyammwe…obusungu bwange buleme okubuubuuka ng’omuliro, olw’ebikolwa byammwe ebibi, ne wataba ayinza kubuzikiza.” Yeremiya 4:4

Era kyogerwa nti,

“Ayi Yerusaalemi, naaza omutima gwo guve mu kukola ebibi olyoke olokolebwe. Olikomya ddi ebirowoozo ebibi?” Yeremiya 4:14

Ewalala okuzikirizibwa kulangirirwa era ne kyogerwa nti,

“Empisa zammwe, n’ebikolwa byammwe bye bibaleeseeko bino. Kino kyekibonerezo kyammwe. Nga kya bulumi. Nga kifumita omutima.” Yeremiya 4:18

Era Mukama agamba nti,

“Kubanga abantu bange basirusiru, tebammanyi. Baana  abatalina magezi; abatategeera. Bakagezimunnyu mu kukola ebibi, tebamanyi kukola birungi.” Yeremiya 4:22

Era kyogerwa nti,

“Dduka ogende eno n’eri mu nguudo za Yerusaalemi, tunulatunula olabe, noonya wonna we bakuŋŋaanira, bw’onoosanga omuntu omu bw’ati omwesimbu ow’amazima, nnaasonyiwa ekibuga kino.” Yeremiya 5:1

Era Mukama abuuza nti,

“Mbasonyiwe ntya? Abaana bammwe banvuddeko ne balayirira bakatonda abatali bakatonda. Bwe nabaliisa ne bakkuta, badda mu kwenda, ne beekuŋŋaana ku nnyumba z’abenzi.” Yeremiya 5:7

Era nti,

“Baali ng’embalaasi ennume ezikkuse ezitaamye, buli muntu ng’akaayanira muka munne.” Yeremiya 5:8

Era Mukama ayogera kukulumbibwa kwa Yuda. Era agamba nti abantu bwe bebuuza lwaki, bakuddibwamu nti,

“Nga bwe mwanvaako ne muweereza bakatonda abalala mu nsi yammwe, mujja kuweereza bakatonda abagwira mu nsi eteri yammwe.” Yeremiya 5:19b

Era Mukama abogerako ng’abantu abalina omutima omwewagguze era omujeemu. Era abantu,

“Abateekuba mu kifuba kugamba nti, ‘Tutye Mukama Katonda waffe agaba enkuba, eya ddumbi n’eya ttoggo, mu ntuuko zaayo; atugerekera ssabbiiti ez’okukunguliramu.’ ” Yeremiya 5:24

Era nti,

“Obutali butuukirivu bwammwe bubibakwese ebibi byammwe bibaggyeeko ebirungi.” Yeremiya 5:25

Era Mukama ayogera nti,

“Ekigambo eky’ekitalo era eky’ekivve kigudde mu nsi; Bannabbi bawa obunnabbi obw’obulimba, bakabona bafuhisa buyinza bwabwe ate abantu bange bwe batyo bwe bakyagala. Naye ku nkomerero munaakola mutya?” Yeremiya 5:30-31

Era Mukama abuuza nti,

“Ndyogera eri ani gwe ndirabula? Ani alimpuliriza? Amatu gaabwe gagaddwa ne batasobola kuwulira. Ekigambo kya Mukama kiri nga kyakusesa gye bali, tebakisanyukira n’akamu.” Yeremiya 6:10

Era nti,

“Kubanga okuva ku asembayo wansi okutuusa ku asingayo waggulu, buli omu alulunkanira kufuna. Nnabbi ne kabona bonna boogera eby’obulimba.” Yeremiya 6:13

Era Mukama abuuza nti,

“Bakwatibwa ensonyi olw’ebikolwa byabwe eby’emizizo? Nedda. Tebakwatibwa nsonyi n’akatono.” Yeremiya 6:15

Era Mukama agamba nti,

“Yimirira mu masaŋŋanzira otunule. Buuza amakubo ag’edda, buuza ekkubo eddungi gye liri, era otambulire omwo, emmeeme yammwe erifuna ekiwummulo.” Yeremiya 6:16

 

 

Nakumanya bwe nnali sinnakubumba mu lubuto lwa maama wo

“Abantu bange bakoze ebibi bibiri, banvuddeko nze ensulo ey’amazzi amalamu ne beesimira ettanka ez’omu ttaka, ettanka ez’omu ttaka ezirimu enjatika ezitanyweeramu mazzi.” Yeremiya 2:13

Ebyassava byaffe leero bigyiddwa mu: Yeremiya 1-3. 

Mukwanjuluza, Mukama Katonda agamba Yeremiya nti,

“Nakumanya bwe nnali sinnakubumba mu lubuto lwa maama wo; nga tonnava mu lubuto n’akutukuza. Nakulonda okubeera nnabi eri amawanga.” Yeremiya 1:5

Wabula tulaba nga Yeremiya agezaako okwekwasa nga bwatamanyi kwogera era nga bweyali omwana omuto. Mukama amutegeeza nti,

“Toyogera nti , ‘Ndi mwana bwana;’ kubanga yonna gye nnaakutumanga gy’onoogendanga, era byonna bye nnaakulagiranga by’onooyogeranga.” Yeremiya 1:7

Era ayongerako nti,

“Tobatyanga kubanga nze ndi naawe okukuwonya.” Yeremiya 1:8

Era Mukama ategeeza Yeremiya nti,

“Leero nkutaddewo okuba n’obuyinza ku mawanga era ne ku bwakabaka. Okusimbula n’okumenya, okuzikiriza n’okuwamba; okuzimba n’okusimba.” Yeremiya 1:10

Era Mukama ategeza Yeremiya nti,

“Era ndibonereza abantu bange olw’ebibi byabwe byonna, kubanga banvaako ne booteeza obubaane eri bakatonda abalala, era ne basinza ebibajje bye beekolera n’emikono gyabwe.” Yeremiya 1:16

Wabula Mukama Katonda alagira Yeremiya okwetegeka, ayimirire abuulire byonna Mukama bya  mulagira. Era Mukama agamba Yeremiya nti,

“Leero nze nkufudde ekibuga ekiriko enkomera ez’amaanyi, era empagi ey’ekyuma, era bbugwe ow’ekikomo eri ensi yonna …” Yeremiya 1:18

Ayongerako nti,

“Balirwana naawe naye tebalikuwangula; kubanga nze di wamu naawe okukununula,”  Yeremiya 1:19

Bwe tweyongerayo, tulaba nga Isirayiri eva ku katonda. Era Mukama atuuma Yeremiya okulangirira Mukama byayogera nti,

“Nzijukira okwewayo kwe weewaayo ng’okyali muto, engeri gye wanjagalamu nga twakafumbiriganwa, wangoberera mu ddungu mu nsi etali nnime.” Yeremiya 2:2

Era nti,

“Isirayiri wali mutukuvu wa Mukama, ebibala  ebibereberye ebyamakungula ge; bonna abaakulyangako nga bazzizza omusango, akabi nga kabatuukako,” Yeremiya 2:3

Era Mukama abuuza ezzadde lya Yakobo nti,

“Kibi ki bakitammwe kye bansangamu ne banvaako ne bagenda ewala ennyo bwe batyo? Baagoberera ebifaananyi byabakatonda abakole n’emikono…” Yeremiya 2:5

Era ayongerako nti,

“Ne batagamba nako nti; Ali ludda wa Mukama eyatuggya mu nsi y’e Misiri; eyatuyisa mu lukoola, mu nsi ey’amalungu n’obunnya, mu nsi enkalu n’ekisiikirize eky’okufa, munsi omutali muntu n’omu, so n’omuntu yenna mw’atayinza kuyita?” Yeremiya 2:6

Era Mukama abuuza nti,

“Waali wabaddewo eggwanga erikyusa bakatonda baalyo, wadde nga si bakatonda, naye nga bitaliimu? Naye abantu bange baawaanyisa ekitiibwa kyabwe n’ebitagasa.” Yeremiya 2:11

Ayongerako nti,

“Abantu bange bakoze ebibi bibiri, banvuddeko nze ensulo ey’amazzi amalamu ne beesimira ettanka ez’omu ttaka, ettanka ez’omu ttaka ezirimu enjatika ezitanyweeramu mazzi.” Yeremiya 2:13

Era mukama ayogera ku kyavirako akabi akagwa ku Isirayiri nti,

“Si ggwe weeretedde bino ng’ova ku Mukama Katonda wo, eyakukulembera akulage ekkubo?” Yeremiya 2:17

Era nti,

“Ebibi byo byennyini bye biri kubonereza, n’okudda kwo emabega kwe kulikusalira omusango. Kale lowooza era otegeere nga bwe kiri ekibi era eky’omutawaana gy’oli bw’ova  ku Mukama Katonda wo, n’oba nga tokyantya,” Yeremiya 2:19

Era tulaba okubonerezebwa kwa Isirayiri olw’okusinza bakatonda abalala. Era Mukama ayogera nti,

Ng’omubbi bw’aswala ng’akwatiddwa, n’ennyumba ya Isirayiri bw’eswala bw’etyo, … nga bagamba emiti nti, “Ggwe kitange,” era n’ejjinja nti, “Ggwe wanzaala.” Bankubye amabega, naye bwe balaba ennaku bankaabirira nti, “Yimuka ojje otulokole. ” Yeremiya 2:26-27

Ayongerako nti,

“Abaana bammwe nababonereza naye nga bwerere, tebakkiriza kugololwa. Mmwe bennyini ne mwettira bannabbi bammwe ng’empologoma bw’etta.” Yeremiya 2:30

Era Mukama abuuza,

“Omuwala omuto ayinza okwerabira ebikomo, oba omugole okwerabira ekyambalo kye? Naye ng’ate abantu bange bannerabidde.” Yeremiya 2:32

Bwe tweyongerayo tulaba Mukama ng’ayita Yuda omukazi atali mwesigwa. Era agamba nti,

“Oyonoona ensi n’obwenzi bwo n’ekibi kyo.” Yeremiya 3:2b

Era nti,

“Noolwekyo enkuba kyevudde eziyizibwa, n’ekuba eya ttoggo n’etetonnya. Naye era otemya nga malaya tokwatibwa nsonyi.” Yeremiya 3:3

Wabula tulaba Mukama ng’awa Yeremiya obubaka buno eri Isirayiri,

“’Komawo ggwe Isirayiri eyanvaako,’ bw’ayogera Mukama. ‘Siribatunuuliza busungu kubanga ndi wakisa,’ bw’ayogera Mukama; ‘Sirisiba busungu ku mwoyo emirembe gyonna.” Yeremiya 3 :12

Era nti,

“Mukkirize bukkiriza ekibi kyammwe, mwajeemera Mukama Katonda wammwe, mwasinza bakatonda abalala, wansi wa buli muti oguyimiridde, era ne mutaŋŋondera. ” Yeremiya 3:13

Ayongerako,

“Era ndibawa  abasumba abakola ng’omutima gwange bwe gwagala, abalibakulembera mu kumanya era ne mu kutegeera. ” Yeremiya 3 :15

Era nti,

“Ebbanga lyonna Yerusalemi kiriyitibwa Entebbe ya Mukama ey’Obwakabaka, amawanga gonna mwe ganaakuŋŋaaniranga okumugulumiza Mukama mu Yerusaalemi era tebliddayo kugoberera mitima gyabwe minyoomi. ” Yeremiya 3:17

Ewalala Mukama ayita abantu be okwenenya,

“Mukomweewo mmwe abantu abatali beesigwa, nnaabawonya ne mbafuula abeesigwa. ” Yeremiya 3:22

Era Abantu baddamu nti,

“Ddala mu Mukama Katonda waffe mwe muli obulokozi bwa Isirayiri. ” Yeremiya 3:23b

Mukama, ali naawe; tokyaddayo kutya kabi konna

“Mukama Katonda ali naawe, ow’amaanyi alokola: alikusanyukira, alikukkakkanyiza mu kwagala kwe, alikusanyukira n’okuyimba.”  Zeffaniya 3:17

Ekijjulo kyaffe leero kigyiddwa mu: Zeffaniya 1-3. 

Bwetujjako akawuuwo,  Katonda ayogera nti,

“Ndizikiriza ddala byonna okuva ku nsi. Ndizikiriza abantu wamu n’ensolo; ndizikiriza ebinyonyi eby’omu bbanga n’ebyennyanja; ababi balisigaza ntuumu ya kafalimbo; ndimalawo abantu okuva ku nsi.”  Zeffaniya 1:2-3

Era Mukama agamba ndi aligololera ku Yuda omukono gwe n’eku abo bonna abali mu Yerusaalemi;

“Abo abadda emabega obutagoberera Mukama, wadde abo abatamunoonya newaakubadde okumwebuuzaako.”  Zeffaniya 1:6

Era Mukama ayogera kukubonereza kubalagajjavu,

“Ne bwe balizimba ennyumba tebalizituulamu, era balisimba ennimiro ez’emizabbibu nazo tebalinywa wayini wamu.”  Zeffaniya 1:13b

Era kyogerwa nti,

“Munoonye Mukama, mmwe mwenna abawombeefu ab’omu nsi, abakola by’alagira; munoonye obutuukirivu n’obuwombeefu; mpozzi mulikwekebwa ku lunaku olw’obusungu bwe.”  Zeffaniya 2:3

Era ku Yuda Mukama agamba nti,

“…Mukama Katonda waabwe alibalabirira, n’akomyawo obugagga bwabwe.”  Zeffaniya 2:7c

Wabula Mukama ayogera kukuzikirizibwa kwa abamowaabu n’Abamoni. Ayongerako nti,

“Eno y’eriba empeera yaabwe olw’amalala gaabwe, kubanga bavumye ne banyooma abantu ba Mukama Ayinzabyonna.”  Zeffaniya 2:10

Era nti,

“Mukama aliba wa ntiisa gye bali bw’alizikiriza bakatonda bonna ab’ensi. Amawanga gonna ag’oku mbalama zonna galimusinza, buli muntu ng’asinziira mu nsi ye.”  Zeffaniya 2:11

Ku bujeemu bwa Yerusaalemi, Mukama agama nti,

“Zikisanze ekibuga ekijooga, ekijeemu era ekyonoonefu! Tekigondera ddoboozi lya Mukama, wadde okukkiriza okubuulirirwa; tekyesiga Mukama; wadde okusemberera Katonda wakyo.”  Zeffaniya 3:1-2

Era kyogerwa nti,

“Mu biro ebyo ndirongoosa enjogera ey’amawanga; bonna balikoowoola erinnya lya Mukama, okumuweereza n’omwoyo gumu.”  Zeffaniya 3:9

Era Ku Isirayiri kyogerwa nti,

“Naye ndireka wakati mu ggwe abantu abakakkamu era abeetoowaze, abo abesiga erinnya lya Mukama.”  Zeffaniya 3:12

Era nti,

“Mukama, ali naawe; tokyaddayo kutya kabi konna.”  Zeffaniya 3:15b

Era nti,

“Mukama Katonda ali naawe, ow’amaanyi alokola: alikusanyukira, alikukkakkanyiza mu kwagala kwe, alikusanyukira n’okuyimba.”  Zeffaniya 3:17

Era ku Isirayiri Mukama ayogerwa nti,

“ndibafuula ettendo ne mbawa ekitiibwa mu nsi zonna gye baaswazibwa.”  Zeffaniya 3:19b

Era nti,

“Weewaawo ndibawa ekitiibwa n’ettendo mu mawanga gonna ag’omunsi zonna, bwe ndikomyawo obugagga bwammwe nga mulaba.”  Zeffaniya 3:20b