Amaaso ga Mukama galaba wonna mu nsi, nga ganyweza emitima gy’abo abamwesigira ddala

” Tekijja kubeetagisa kulwana lutalo luno. Mubeere mu bifo byammwe, mube bagumu mulabe obuwanguzi Mukama bw’abanabawa mmwe.” 2 Ebyomumirembe 20:17

Ebya ssava byaffe leero biggyiddwa mu:  1 Bassekabaka 10-11, 2 Byomumirembe 9; 1 Bassekabaka 12-14; 2 Byomumirembe 10-12; 1 Bassekabaka 15:1-24, 2 Byomumirembe 13-16; 1 Bassekabaka 15:25-16:34, 2 Byomumirembe 17;1 Bassekabaka 17-19; 1 Bassekabaka 17-19; 1 Bassekabaka 20-21; 1 Bassekabaka 22, 2 Byomumirembe 18; 2 Byomumirembe 19-23.

Mu kusosootoola, tulabanga kabaka omukazi Seeba akyalidde kabaka Sulemaani.

“Awo kabaka omukazi ow’e Seeba bwe yawulira ettutumo lya Sulemaani n’okwagala kwe yalina eri Mukama, n’ajja amugezese n’ebibuuzo ebizibu.”  1 Bassekabaka 10:1

Wabula ku kye yalaba, yayogera ati,

“Bye nawulira nga ndi mu nsi yange, ku ebyo by’okoze n’amagezi go, bya mazima. Ssakkiriza bigambo ebyo okutuusa lwe neesitukira ne nzija neerabireko n’agange. Kya mazima ddala nabulirwako kitundu kitundu butundu kyokka; kubanga amagezi go, n’obugagga bwo businga ku ebyo bye nawulira.”  1 Bassekabaka 10:6-7

Era kyogerwa nti,

“Kabaka n’afuula ffeeza okuba ng’amayinja aga bulijjo mu Yerusaalemi.”  1 Bassekabaka 10:27

Emabegako Mukama yali yalabula Abayisirayiri ku bakazi bannaggwanga ng’agamba nti,

“Temufumbiriganwanga nabo kubanga tebalirema kukyusa mitima gyammwe okugoberera bakatonda baabwe .”  1 Bassekabaka 11:2

Wabula ye Sulemaani, yawasiza ddala bangi. Bwe kityo kyogerwa nti,

“Mu bisera bya Sulemaani eby’obukadde, bakyala be ne basendasenda omutima gwe okugoberera bakatonda abalala.”  1 Bassekabaka 11:4

Era kyogerwa nti,

“Sulemaani n’akola ebitaali bya butukirivu mu maaso ga Mukama, n’atakola nga Dawudi kitaawe bwe yakola.”  1 Bassekabaka 11:6

Era Mukama kwe ku mugamba nti,

“Olw’empisa zo, n’obutakuuma ndagaano yange newaakubadde okugondera amateeka gange ge nakulagira, ndikuggyako obwakabaka, ne mbuwa omu ku baddu bo.”  1 Bassekabaka 11:11

Wabula olwa Dawudi, Mukama teyakikola Sulemaani wabula mutabani eyali ow’okumisikira. Wabula era agamba nti,

“Ate era sirimuggyako bwakabaka bwonna, naye ndimuwa ekika kimu ku lwa Dawudi omuddu wange, n’olwa Yerusaalemi, kye neerondera.”  1 Bassekabaka 11:13

Bwe wayitawo ebbanga Yerobowaamu mutabani wa Nebati, omu ku bakungu ba Sulemaani, n’ajeemera kabaka. Era n’afuna obunabbi nga bwe yali agenda okuwebwa okufuga ebika kkumi. Era Yerobowaamu ategezebwa ekyali kigenda okukozesa Mukama ekyo,

“Kino ndikikola kubanga banvuddeko ne basinza Asutoleesi katonda omukazi ow’Abamoni, ne batatambulira mu kkubo lyange, wadde okukola ebituufu mu maaso gange newaakubadde okugondera ebiragiro byange oba amateeka gange, nga Dawudi kitaawe wa Sulemaani bwe yakola.”  1 Bassekabaka 11:33

Wabula nti,

“Ekika ekimu ndikiwa mutabani we, omuddu wange Dawudi abeerenga n’ettabaaza mu maaso gange mu Yerusaalemi, ekibuga kye neeroboza olw’erinnya lyange.”  1 Bassekabaka 11:36

Bwe tweyongerayo, tulaba nga Lekobowaamu, mubani wa Sulemaani atula ku ntebbe ey’obwakabaka. Tulaba nga waliwo ekibiina eky’ajja eri Lekonowaamu nga kimusaba awewule kubuzito bwe kikoligo Sulemaani kye yaali abataddeko. Lekobowaamu bwe yebuuza ku bakadde, ne bamuddamu nti,

“Leero bw’onoobera omuwulize eri abantu bano ne weetoowaza, n’obaweereza, era n’obaddamu n’egonjebwa, kale banaabeeranga baweereza bo.”  1 Bassekabaka 12:7

Wabula amagezi ago teyagatwala kiryoke kituukirire, Isirayiri yesale era ejemere ennyumba ya Dawudi.

“Bw’atyo Isirayiri n’ajemeera ennyumba ya Dawudi n’okutuusa leero.”  1 Bassekabaka 12:19

Era Yerobowaamu bwe yakomawo okuva mu buwaŋŋanguse, nebamutikkira okuba kabaka wa Isirayiri yonna okujjako ekika kya Yuda ekyasigala nga kifugibwa era nga kigoberera ennyumba ya Dawudi.

Olw’okwagala okwenywereza mu bwa kabaka, Yerobowaamu n’asala amagezi okutanira Isirayiri okugenda okusinziza e Yerusalemi. Bw’atyo nakola ennyana bbiri eza Zaabu era n’agamba abantu nti,

“Kijja kubazitoowerera nnyo okwambukanga e Yerusalemi. Baabano bakatonda bammwe, Ayi Isirayiri, abaabaggya mu misiri.”  1 Bassekabaka 12:28

Oluvanyuma tulaba ng’obunnabi buwebwa ku kimu ku kyoto Yerobowaamu kye yayoterezangako obubaane.

“Ayi ekyoto, ekyoto! Kino Mukama ky’agamba nti, Omwana erinnya lye Yosiya alizalibwa mu nnyumba ya Dawudi, ku ggwe kw’aliweerayo bakabona ab’ebifo ebigulumivu ng’ebiweebwayo era n’amagumba g’abantu galyokerwa ku ggwe.”  1 Bassekabaka 13:2

Webula n’abbi omukadde nasendasendasenda nnabi ey’awa obunnabi buno oukyama alye ku mmere. Era namuddamu nti,

“Ndagiddwa ekigambo kya Mukama nti, toteekwa kulyayo ku mmere newaakubadde okunywayo amazzi, wadde okuddirayo mu kkubo lye wajjiddemu.”  1 Bassekabaka 13:17

Era tulaba ng’empologoma emulya. Nnabi omukulu bwe yakiwulira, n’agamba nti,

“Ye musajja wa Katonda ataagondedde kigambo kya Mukama. Mukama amuwaddeyo eri empologoma emutaagudde n’emutta, ng’ekigambo kya Mukama bwe ky’amulabudde.”  1 Bassekabaka 13:26

Wabula tutegezebwa nti, wadde ng’obunnabi bwawebwa,

“Yerobowaamu n’atakyuka ne yeeyongera nate okussaawo bakabona ab’ebifo ebigulumivu ng’abaggya mu bantu abaabulijjo. Buli eyayagalanga okubeera kabona, n’amwawulanga okubeera kabona mu bifo ebigulumivu.”  1 Bassekabaka 13:33

Era tulaba nga Akiya nnabi alagula era nga ategeeza Yerobowaamu obubaka bwa Mukama Katonda gyali,

“Nakugulumiza nga nkuggya mu bantu, ne nkufuula omukulembeze wa bantu bange Isirayiri. Naggya obwakabaka mu nnyumba ya Dawudi, ne mbukuwa, naye tobadde ng’omuddu wange Dawudi, eyagondera ebiragiro byange era n’abigoberera n’omutima gwe gwonna, ng’akola ekyo ekyali ekirungi mu maaso gange. Oyonoonye nnyo okusinga bonna abakusooka. Weekoledde bakatonda abalala, n’okola n’ebifaananyi ebisaanuuse n’onneerabira; onsunguwazizza nnyo.”  1 Bassekabaka 14:7-9

Bwe tweyongerayo mumaaso, tulaba nga Abiyaamu atanula okufuga Yuda. Era Kitegezebwa nti,

“N’akola ebibi byonna kitaawe bye yakolanga, omutima gwe ne gutatuukirira mu maaso ga Mukama Katonda we ng’omutima gwa jjajjaawe Dawudi bwe gwali.”  1 Bassekabaka 15:3

Bwe tweyongerayo, tulaba nga Asa alya obwakabaka bwa Yuda. Era kitegezebwa nti,

“Asa n’akola ebirungi mu maaso ga Mukama, nga jjajjaawe Dawudi bwe yakola. N’agoba mu nsi abaalyanga ebisiyaga…” 1 Bassekabaka 15:11

Era nti,

“Omutima gwe gwali ku Mukama ennaku ze zonna.” 1 Bassekabaka 15:14

Mu biiro bya Asa eby’oluvanyuma, afuna obubaka obugamba nti,

“Amaaso ga Mukama galaba wonna mu nsi, nga ganyweza emitima gy’abo abamwesigira ddala.” 2 Ebyomumirembe 16:9

 

Oluvanyuma Asa yalwala ebigere. Era tutegezebwa nti,

“Neewakubadde ng’obulwadde bweyongera, teyanoonyanga buyambi okuva eri Mukama, yabunoonyanga mu basawo bokka.” 2 Ebyomumirembe 16:12

Bwe tweyongerayo, tulaba nga Yekosafaati mutabani wa Asa addira kitaawe mu ntebe. Era kyogerwa nti,

“Mukama n’abeera wamu ne Yekosafaati kubanga mu buto bwe yatambuliranga mu makubo ga jjajjaawe Dawudi ge yatambulirangamu.” 2 Ebyomumirembe 17:3

Era nti,

“Omutima gwe ne gunywerera mu kkubo lya Mukama, n’okuggyawo n’aggyawo ebifo ebigulumivu n’ebifaananyi bya Baasera mu Yuda.” 2 Ebyomumirembe 17:6

Era tulaba nga Nadabu mutabani wa Yerobowaamu alya obwakabaka bwa Isirayiri wabula wayitawo akaseera katono Baasa mutabani wa Akiya, n’amutta. Era yagenda mu maaso,

“N’atta ennyumba ya Yerobowaamu yonna n’atalekaawo muntu n’omu mulamu. Yabazikiriza bonna ng’ekigambo kya Mukama kye yayogerera mu muddu we Akiya Omusiiro, olw’ebibi bya Yerobowaamu bye yakola, era bye yayonoonesa Isirayiri, n’okusunguwaza ne bisunguwaza Mukama Katonda wa Isirayiri.” 1 Bassekabaka 15:29-31

Wabula Baasa ate naye natasanyusa Mukama, era naweebwako obunnabi nti,

“Nakugulumiza nga nkuggya mu nfuufu ne nkufuula mukulembeze w’abantu bange Isirayiri, naye watambulira mu ngeri za Yerobowaamu era n’oyonoonyesa abantu bange Isirayiri, ne bansunguwaza n’ebibi byabwe.” 1 Bassekabaka 16:2

Nga wayiseewo ekiseera tulaba nga Akabu lya obwakabaka bwa Isirayiri. Era ayogerwako nti,

“Akabu mutabani wa Omuli n’akola ebibi mu maaso ga Mukama okusinga bonna abaamusooka.” 1 Bassekabaka 16:30

Era mu kiseera ekyo, Eriya Omutisubi ow’e Tisubi mu Gireyaadi y’agamba Akabu kabaka nti,

“Mukama Katonda wa Isirayiri gwe mpeereza nga bw’ali omulamu, tewaabe musulo newaakubadde enkuba mu myaka egijja wabula olw’ekigambo kyange.” 1 Bassekabaka 17:1

Mukiseera ekyo Mukama yategeeza Eriya nti,

“Vva wano ogende ebuvanjuba weekweke ku kagga Kerisi akoolekera Yoludaani. Ojja kunywanga mu kagga, era ndagidde bannamuŋŋoona okukuliisiza eyo.” 1 Bassekabaka 17:3

Akagga bwe kakalira, Mukama nasindika Eriya ewa nnamwandu okulisibwa ng’eyo.

Bwe twebungulula, tulaba nga namwandu afirwa omulenzi we. Wabula Eriya namuzukiza. Yasaba nti,

“Ayi Mukama Katonda wange, obulamu bw’omulenzi ono bukomewo nate!” 1 Bassekabaka 17:21

Era bwe yazukira, nnamwandu n’ayogera nti,

“Kaakano ntegedde ng’oli musajja wa Katonda, era n’ekigambo kya Mukama ekiva mu kamwa ko kiba kya mazima.” 1 Bassekabaka 17:24

Oluvanyuma, Eriya akuŋŋaanya Isirayiri ku lusozi Kalumeeri. Era n’ayogera eri ekibiina kyonna nti,

“Mulituusa wa okutta aganaaga? Obanga Mukama ye Katonda mumugoberere, naye obanga Baali ye Katonda mugoberere oyo.” 1 Bassekabaka 18:21

Era Eriya, ayogera eri abantu ne bannabbi ba Baali nti, ye ne bannabi banno ebina baali bakuwayo ssaddaka eri gwe bayita Katonda. Nateekawo akawayiro nti,

” Anaddamu n’omuliro nga ye Katonda.” 1 Bassekabaka 18:24b

Ekiseera kya Eriya eky’okusaba bwe kyatuuka, nayogera nti,

” Onzireemu, Ayi Mukama, onziremu, abantu bano bamanye, Ayi Mukama nti Ggwe Katonda, era nti ggwe okyusa emitima gyabwe okudda gy’oli.” 1 Bassekabaka 18:37

Mukama bwe yayanukula n’omuliro, abantu bonna ne bavuunama ne bakaaba nnyo nga bagamba nti,

” Mukama, ye Katonda! Mukama, ye Katonda!” 1 Bassekabaka 18:39b

Ekyaddirira kwe kuttibwa kwa bannabi ba Baali. Yezeberi mukyala wa kabaka Akabu bwe yakiwulira, naweera enkolokooto okutta Eriya. Eriya naddukira e Kolebu okuwonya obulamu bwe.

Ebyaddirira Mukama ayogereganya ne Eriya mu ddungu. Era Eriya nayogera nti ye yaali asigaddewo yekka ku bannabi ba Mukama. Wabula Mukama y’amuddamu nti,

” Nesigaliza akasanvu mu Isirayiri, abatavuunamiranga Baali wadde okumunywegera.” 1 Bassekabaka 19:18

Oluvannyuma tulaba Akabu ng’awangula Benikadadi mu lutabalo. Wabula kino kyali bwe kiti olwobunnabi Mukama bwe yawa Akabu nti,

” Olw’okuba Abasuuli balowooza nga Mukama Katonda wa ku nsozi so si Katonda wa mu biwonvu, ndigabula eggye lino eddene mu mukono gwo otegeere nga nze Mukama.” 1 Bassekabaka 20:28

Bwe tweyongerayo, tulaba nga Akabu atwala ennimiro ya Nabosi era nga Yezeberi yeyakola omupango guno era nga kyaletera ne Nabosi okuttibwa. Era nga Yezeberi awebwa obunnabi nti,

” Bw’ati bw’ayogera Mukama, nti, mu kifo embwa wezikombedde omusaayi gwa Nabosi, embwa mwezirikombera ogugwo.” 1 Bassekabaka 21:19

Ku Akabu kyogerwa nti,

” Tewali musajja eyafaanana nga Akabu, eyeewaayo okukola ebibi mu maaso ga Mukama ng’awalirizibwa mukazi we Yezeberi.” 1 Bassekabaka 21:25

Wabula Akabu ng’amaze okufuna obunnabi okuva eri Eriya, yayuza engoye ze, n’ayambala ebibukutu n’okusiba n’asiiba. Era Mukama n’agamba Eriya nti,

” Olw’okubanga yeewombeese mu maaso gange, sirireeta kabi ako mu mirembe gye, naye ndikaleeta mu nnyumba ye mu mirembe gya mutabani we.” 1 Bassekabaka 21:29

Ku Yekosafaati, kabaka wa Yuda mutabani wa Asa, kyogerwa nti,

” N’atambulira mu ngeri za kitaawe Asa era natazivaamu, ng’akola ebirungi mu maaso ga Mukama.” 1 Bassekabaka 22:43

Mu biiro ebyo, Yekosafaati kabaka wa Yuda ne yeyunga ne Akaba kabaka wa Isirayiri ne batabala. Olutabalo luno lwafiramu Akabu. Wabula Yekosafaati bwe yadda, yabuzibwa omulabi Yeeku nti,

” Kituufu ggwe okuyamba ababi, ate n’okukolagana n’abo abakyawa Mukama?” 2 Ebyomumirembe 19:2b

Era tulaba nga Yekosafaati alonda abalamuzi, nabakkutira nti,

” Mufumitirize nnyo ku bye mukola, kubanga temulamula ku bw’abantu wabula ku bwa Mukama, abeera nammwe buli bwe musala omusango. Noolwekyo entiisa ya Mukama ebeere mu mmwe, musale omusango nga mugwelanyizza bulungi, kubanga Mukama Katonda waffe takkiriziganya na butali butuukirivu, era tewali kusosola mu bantu wadde okulya enguzi” 2 Ebyomumirembe 19:6-7

Nga wayisewo ebbanga ttono Yekosafaati yalumbibwa Abamowabu n’Abamoni era natya nnyo.

” Yekosafaati n’atya nnyo n’amalirira okwebuuza ku Mukama, era n’alangirira okusiiba mu Yuda yonna.” 2 Ebyomumirembe 20:3

Era yatanula okusaba,

” Tetumanyi kya kukola, wabula amaaso gaffe gatunuulidde ggwe.” 2 Ebyomumirembe 20:12c

Abantu bonna nga bali mu maaso ga Mukama, ekigambo kyayogerwa Mukama okuyita mu Yakaziyeeri nti,

“Temutya era temuggwaamu mwoyo olw’eggye eryo eddene, kubanga olutalo si lwammwe, naye lwa Katonda.” 2 Ebyomumirembe 20:15b

Era nti,

” Tekijja kubeetagisa kulwana lutalo luno. Mubeere mu bifo byammwe, mube bagumu mulabe obuwanguzi Mukama bw’abanabawa mmwe.” 2 Ebyomumirembe 20:17

Oluvanyuma lwebyo, tutegezebwa nti,

” Entiisa ya Mukama n’ejja ku bwakabaka bwonna obw’omu mawanga, bwe baawulira nga Mukama yalwana n’abalabe ba Isirayiri.” 2 Ebyomumirembe 20:29

Era ne Yekosafaati,

” N’atambulira mu kkubo lya Asa kitaawe, n’atalivaamu, era n’akola ebyali ebirungi mu maaso ga Mukama.” 2 Ebyomumirembe 20:32